Ош шошо
Шӱла шошо кундем мучко,
Ныжыл пушым шаркален.
Теле кайыш, кушкыж пӱчым,
Май оръеҥ гай куанен.
Шупшал шындыш тыйым кече,
Кӱдырмуно шарлымеш.
Ынде кумыл йӧршын весе:
Кӱдыроҥгыр пеледеш.
Шошо – тиде тӱнян кумыл,
Куанаш ӱжеш южшат.
Кодыш чоным йӱштӧ ӱмыл,
Весым илышым ужат.
Анна Алыкечева
Шошо
Ужат, паштеҥге лум шула,
А мланде оҥ гыч пар кӱза.
Пеледыш, икымше, чоян
Ончале ош лум йымачак.
Турня-влак икте-весыштлан
Колтат саламым, йӱкланат.
А нарашта пушеҥге-влак
Ужар шикш дене петырнат.
Агытанжат пеш куанен,
Шке мурыжым шергылтара.
У шошо толмым шижылден,
Тӱняште кажнын чон мура.
Зоя Савельева
Пеледышан турий муро
Шӱмыштем чечен пеледыш
Пеледалте омыштем.
Кечыйол шупшалын кодыш,
Ынде мыйже мом ыштем?!
Ошкылам пасу покшечын –
Турий йӱкым колыштам.
Тиде семжым мый кушечын
Пеш шукертак колынам!?
Уэш йоҥгыш турий муро,
Йыр пеледышым шарен.
Пуйто мане «Пырля муро!»
Шӱмышкем шыпак пурен.
Муралтальым мый пеленже,
Изи годсым шарналтен.
Шӱмбелемын шыма йӱкшӧ
Помыжалтыш йöратен.
Чонештална меже коктын,
Кава тӱрыш куанен.
Илена тӱняште модын,
Ӱмыр мучко йöратен.
Галина Малинина
***
Теле мучко мален, маска семын,
Шошылан куанен кынелам,
У сем ден пойдаралтше чонемым –
Сондыкемым – тыматлын почам.
Кеч йога ӱмыр жап шошо вӱд гай,
Ок тоштем мыйын чон сондыкем,
Марлан толмо погем аныклем мый:
Ош, тӱран тувырем пайрем годым чием.
Аныклем чонешем сылнымут леҥежем,
Куанен, жап толмек, саскам кӱын шумек,
Ош кагазыш велем, «Пайда лийже!» шонем.
«Шере-кочыжым» лач акла ынде лудшем.
Надежда Рыбакова.
Шошо
Кап-кап шокта йӱдвошт тӱжвалне,
Шолап гыч вӱд шыман чыпча.
Изи пӧртнан леваш ӱмбалне
Эше лум ятырак шинча.
Но шошо пуш шарлен вӱд дене,
Мардеж укшлам лыжган рӱпша.
А таче, колынам эрдене,
Шем шырчык менгыште шӱшка.
Вашталтышым шинча ден огыл,
Шӱмет ден вашкерак шижат.
Ах, шошо, тый осалже отыл,
Молан изи чонем туржат?
Людмила Семёнова, Арбор села