Йошкар-Олаште илыше да ятыр ий игечым эскерыше Геннадий Рыбаков палдара:
– Теле эртенат кайыш. Тений тудо Йошкар-Олаште пытартыш 40 ий жапыште эскерыме теле деч, кокла шот дене ончымаште, изиш левырак лекте. Пытартыш 30 ийыште Йошкар-Олаште йӱштӧ теле 12 гана лийын, а леве – 18 гана.
Тений кеҥеж молгунамсе деч ойыртемалтшаш огыл, тыглай кеҥеж гайракак лийшаш. А шошо нерген ойлаш гын, 1899-1959 ийлаште кокла шот дене 2,57 градус леве шоген, 1992-2022 ийлаште – 4,57 градус леве. Теният шошо леве игече дене куандарышаш.
Но тений мартыште йӱштырак игече шоген кертеш, -5 градус деч левырак лийшаш огыл. Мартын кокымшо пелыжат мартын икымше пелыж деч 2 градуслан гына левырак лийын кертеш.
Йошкар-Олаште пытартыш 34 ийым ончалаш гын, мартыште кокла шот дене 3,7 градус юалге шога, а 1859-1959 ийлаште 6,7 градус йӱштӧ лийын. Эн йӱштӧ (-9,4 градус) март Йошкар-Олаште 2018 ийыште лийын. Эн леве март 2020 ийыште шоген, юж 1,4 градус марте ырен.
Пытартыш 30 ийыште мартыште эскерыме почеш Йошкар-Олаште 8-14 кече лум лумын. Но южо ийын телымсе кум тылзе деч утла ситарен. Тыге лийын 2005 да 2013 ийлаште. Теният тыгак лийын кертеш.