Кужэҥер район Шӱдымарий кундемыште калык поро кумылан да икте-весе дене келшен ила манме вигак шижалте. Иктаж еҥ деке миен эҥертышна гын, полшашак тыршышт. Журналист-влак денат кутыраш иктат ыш торешлане (нимом шылташ: тыгайже эреак лиедат).
Шӱдымарий ялыште ик уремым Сеҥымаш урем манын лӱмдымӧ. Тыгайже районыштыжат тыште гына. Сандене Сеҥымашлан 75 ий темме вашеш тудым олмыктеныт, асфальтым шареныт. А урем ваштареш Кугу Отечественный сарыште кредалше-влак лӱмеш обелиск верланен.
Чылажат – ик верыште
Лачак Сеҥымаш урем ваштареш ик пачашан ош кермыч пӧрт торашке волгалтеш. Тушто икмыняр тӧнеж пашам ышта: Шӱдымарий тӱвыра пӧрт, ял шотан илем, книгагудо, шуко функциян рӱдер.
Чыла тидын нерген йодышташ Шӱдымарий ял шотан илемыш пурышна. Мемнам тудым вуйлатыше Ольга Петухова ден тӱҥ специалист Валентина Щербакова вашлийыч.
О.Петухова – кум шочшан ава. Ондак верысе тӱвыра пӧртым вуйлатен, «Акашево» чыве фабрикыште учётчицылан тыршен. А кумшо йоча дене шинчыме деч вара у пашашке кыртмен пижын.
В.Щербакова профессийже дене – бухгалтер. Верысе озанлыкыште, варажым кевытыште пашам ыштен. А пелашыже ятыр ий Москошко кудалыштеш.
Коктынат ты верыште 2021 ий годсек пашам ыштат. Лачак ты ийын тысе калыклан кугу куан толын – сентябрьыште газым пуртымо. 2022 ийыште Шӱдымарийыште ял пайремым эртарыме.
УМБАКЫЖЕ — «Кугарня» газетыште.