Шошым, пӱртӱс помыжалтме годым, ятыр еҥ вийдымылыкым шижеш. Тыгай годым «Авитаминоз» манына да уремыш кечыйол йымалне шыратен кошташ лектын куржына. А тылеч вара эше вуй коршташ тӱҥалеш, шинчавӱд йога, сутка мучко малыме шуэш. Шокшо игече толмо дене мыланна молан йӧндымӧ?
Тидыже теле биоритм кеҥежымсыш куснымо дене кылдалтын – капкылысе орган дене системе-влак вес тӱрлӧ баланслан келыштаралтыт. Пӱртӱсыштӧ лийше ты процессым шошо игечат нелемда: атмосферный давлений, вӱдыжгылык, кечын утларак пелтымыже шке пашаштым ыштат.
Шошымсо тура кечыйол деч шукыж годым йоча-шамыч да илалшырак-влак, шинча черан але шинчаваш (сетчатка) але шинчачораш (роговица) операцийым ыштыктыше пациент-влак «орланат». Ультрафиолет излучений утыждене логалме годым тӱрлӧ шинча чер вияҥын кертеш: фотокератит, шинча меланома да молат. Тыгай годым шинчагӱланат (хрусталик) эҥгек лиеш, катаракта чер вияҥеш.
Кече деч аралалтса
Уремыш лекмыда годым пелен кече деч шинчам аралыше очким налаш ида мондо. Пластик гыч ыштыме тыгай шинчалыкат янда гыч ыштыме семынак шинчам кечыйол деч арала.
Кече деч аралыше лӱмын крем дене пайдаланыза. Кызыт кевытлаште тӱрлӧ тыгай кремым ужалат.
Тура кечыйол йымалне утыждене шуко кошташ ок лий, коваште йӱленат кертеш.