Марий Элысе кресаньык-фермер озанлык-влак пасу паша тургым тӱҥалмылан ямдылалтыт. Ӱдышаш нӧшмӧ ситыше, техникым уэмдыме, шӱрымӧ материал уло.
Тидын нерген 1 мартыште Марий Эл вуйлатыше А.Евстифеевлан Правительстве председательын икымше алмаштышыже А.Гречихо увертарен. Тудын ойлымыж почеш, ӱмаште аграрийыште сай лектыш лиймылан кӧра тений у тургымлан ямдылалташ куштылгырак лийын. Пырчан, отызан да технический культур, икияш я шукияш шудо нӧшмӧ ямде. Уло республиклан 24,8 тӱжем тонн кӱлеш манын палемдыме лийын гын, тений 25,3 тӱжем тонным кодымо. Тыгодым 99,5 % нӧшмӧ чыла шотыштат сай качестванлан шотлалеш. Таҥастарашлан: 2018 ийыште тыгай нӧшмо 70% лийын. Тылеч посна 17% нӧшмӧ элитный семын палемдалтеш. Тидыже ӱмашсе деч 5%-лан шукырак.
А.Гречихо тыгак минеральный ӱяҥдышым ямдылыме шотышто увертарен: пасу паша тӱҥалмылан 6,5 тӱжем тонн минеральный ӱяҥдышым налаш палемдыме, таче кечылан 4 тӱжем тонным кондымо. Тидыже кӱлеш ӱяҥдышын 65% лиеш
Кажне категориян озанлыклам ончалаш гын, тений ӱдышаш кумдык мланде чылаже 295 тӱжем гектарыш шуэш. Тиде кодшо идалык деч 2 тӱжем гектарлан шукырак.
Тений чылаже 12 у техникым – трактор ден шурным погышо комбайным – налме. Чылаже шошым пасу пашам 1609 трактор шукташ тӱҥалеш.
Но ялозанлык пашаште кызытеш кадр огеш сите. Шошо агам тӱҥалаш да сайын виктарен колташ чылаже 880 механизатор кӱлеш, таче ты пашам республикыште 728 еҥ гына шукта. Тиде ситыдымашым калыклан пашаверым пуымо службо гоч тракторист-влакым жаплан пашаш налме йӧн дене тӧрлаш палемдыме.