Кораксола тӱвыра пӧртын «Муро кумыл» фольклор ансамбльже Шорыкйол пайрем кечын верысе ял калык деке «Шорыкйол мӧчӧр-влак» программе дене лектын. Ты гана шинчымаш касышкына 15 мӧчӧр ушнен, Кораксоласе кок уремым тӱрыс авалтен.
Мӧчӧр-влакын тошто илыш-йӱлам шуктен колтымышт, кажне суртышко пурымо годым озаватын куштыктымыж почеш сӧралын тошто семын тавалтен-тавалтен сугыньым пуымышт, шке тӱжвал сынышт дене чумыр ешым куандарен моштымышт чылалан пеш келшен. Южо суртшо уло кумылын Васли кува-кугызам вученак шога: капкажат комдык почмо, пайрем чесыжат ӱстел тич, озавате пӱкшымат шке кидше дене ыштен ямдыла, мӧчӧрлан кум тӱрлӧ чесым пӧлек шотеш кучыкта.
Елена Григорьева, Кораксола ялысе тӱвыра пӧрт вуйлатыше.
