Шорыкйол – марий калыкнан ик эн йӧратыме да вучымо пайремже. Морко район Кораксола тӱвыра пӧрт пеленысе «Муро кумыл» фольклор ансамбль Шорыкйол пайрем кечын верысе ял калык деке «Шорыкйол мӧчӧр-влак» программе дене лектын. Шинчымаш касышкына 10 мӧчӧр ушнен, Кораксоласе кок уремым тӱрыс авалтен.
Мӧчӧр-влакын тошто илыш-йӱлам шуктен колтымышт, кажне суртышко пурымо годым озаватын кӱштымыж почеш сӧралын тошто семын тавалтен-тавалтен сугыньым пуымышт, шке тӱжвал сынышт дене чумыр ешым куандарен моштымышт чылалан пеш келшен. Южо суртшо уло кумылын Васли кува-кугызам вученак шога: капкажат комдык почмо, пайрем чесыжат ӱстел тич, озавате пӱкшымат шке кидше дене ыштен ямдыла, мӧчӧрлан кум тӱрлӧ чесым пӧлек шотеш кучыкта.
Кӧ жаплен Шорыкйол пайремым, кудо сурт вучен шуктен Шорыкйол мӧчӧр-влакым, тек чыланыштынат илышышт пиалан, ӱмыр ярымышт кужу, кинде-шинчал ден шийвундо перкешт тичмаш лийын шога. Вет лач тыге ме кугезе йӱлам арален шогымашке шке надырнам пыштена. Суапле пашам шуктен толына. Тау чылалан! Пиалан лийза!
Елена Григорьева, Кораксола ялысе тӱвыра пӧрт вуйлатыше.
Снимкылаште: Шорыкйол мӧчӧр-влак Кораксола ял калык дене уна лийыныт, сай сугыньым пуэныт.
