Шоптыр лышташнерысе пудий (Cecidophyopsis ribis) утларакшым шемшоптырлан эҥгекым конда. Тудо эн лӱдыкшӧ шукш-копшаҥге! Пудий емыж лектышым гына огыл, вондым пӱтынек пытарен кертеш. Тиде пудийым йошкар але ошшоптыр да пунаншоптыр вондышто ужыда гын, ида ӧр — тушкат шарла.
Шошым шоптырвондышто чотак оваргыше лышташнерым ужыда гын, вигак нуным налын кудалтыза. Тиде пудий! Тыгай копшаҥге улмо годым вондо писын огеш куш, лышташ-влакат лекмым чарнат, лышташнер-влак йыргешке гай лийыт, пеледышат удан пеледалтыт.
Шотыш налза:
— черле вондо гыч вурдым (черенок) ида нал;
— вондым пӱчмӧ деч вара ӱзгар-влакым сайын мушса;
— вондо-влакым спецпитомникыште гына налза.
Пудийым кузе пытараш?
Шыжым лышташ велын пытыме деч вара, вондым сайын тергыза, черлын койшо вургыжым кораҥдыза. Лышташнер-влак чот кугу койыт гын, нуным кораҥдыза але ару секатр дене черле ужашыжым пӱчкын налза. Пудий шуко гын, тудым тӱҥ гычак пӱчман. Але черле олмеш у сортым шындыза.
Умбакыже 15 апрельыште лекше «Кугарня» газетыште лудса.