Манеш Советский посёлко гыч Станислав Рябчиков.
Тудо специальный военный операцийыш 2023 ийыште шке кумылын каен. «Гиря» позывноян салтак икмыняр гана сусырген, эмлымверыште киен. Кызыт пӧръеҥым тазалык шотышто нелылыклан верч запасыш колтеныт.
Школ деч вара С.Рябчиков армийыш каен. Шочмо кундемыш пӧртылмекыже, келшыме ӱдыржӧ Наталья дене сӱаным ыштеныт. Да пӧръеҥ эше ик кугу шонымашыжым шуктен – МарГУ-ш тунемаш пурен. Йочаж годымак тудо техникым пургедаш йӧратен. Электрике, механикылан шӱман лийын. Дипломым налмеке, опытым погаш манын, шке посёлкыштак ик предприятийыште электромеханиклан, районысо теплосетьлаште электриклан ыштен. Вара шылым перерабатыватлыше заводышто вӱдышӧ инженер-энергетик лийын, а икмыняр жап гыч – контрольно-измерительный прибор да автоматике шотышто инженер.
Шке кумылын
– СВО тӱҥалмеке, увер-влакым эре эскерен шогенам. 2022 ий шыжым мобилизацийым увертаренытат, Сергей тукым шольым тушко шке кумылын каен. Чаманен каласыман, 2023 ий февральыште тудо сӧй пасуэш вуйым пыштен. Тылеч вара СВО-ш каяш шонымашым кӧргыштем нумал коштынам. Да шкем ямдылаш тӱҥалынам: кажне кечын куржталынам, капкылым пеҥгыдемденам, тыгак медицине, военный тактике нерген литературым лудынам. Тудо ийынак ноябрьыште контрактым подписатленам.
Пелашемлан путырак неле лийын, шонем. «Ит кай» манын ойлен огыл, вет пален: шонен пыштенам гын, ыштем. Кок икшывына йол ӱмбак шогалыныт, нунат тургыжланеныт, но мыйым ты ошкылым ыштыме деч чарен огытыл. Ача ден авамат чот ойгыреныт, нуным гын путырак лыпландараш логалын, – каласкала пӧръеҥ.
«Гиря» Донецк направленийыш мотострелковый бригадыш логалын. 5 декабрьыште, кокымшо задачым шуктымо годым Станислав Валерьевич сусырген, кок йолышкыжат мине осколко-влак логалыныт. Луганск эмлымверыште кум арня эмлалтын.
«Гиря» позывнойым пӧръеҥ теве молан ойырен. Контрольно-измерительный прибор-влак шотышто инженер виса-влакым калиброватлыме годым тӱрлӧ нелытан кир-влак дене пайдалана. Тидак тыгай позывнойым ойырен налаш амалым ыштен.
«Лӱдмылан шкем авалташ пуыман огыл»
– Лӱдмаш тушто вес семын палдырна, вӱрыштӧ адреналин эре шуко. Авдеевкым налме годым путырак тале бой-влак ыльыч. Шукыж годым ик пункт гыч весыш кок-кум еҥ дене йолын коштмо. Уке гын тушман «кайык» вашке шеклана да пытара. Икана тыгай аппарат мыйымат сайын поктылын, йӧра, пушеҥге шеҥгек шылын утаралт кодын сеҥенам.
Неле ситуаций годым шкем кучен моштыман, паникылан, лӱдмылан шкем авалташ пуыман огыл. Пырля служитлыше пӧръеҥ-шамыч дене ик еш гай лийынна. Икте-весылан эре полшенна, кӧлан мо кӱлеш вашла эре пуэнна. Гуманитарный полыш жапыштыже толын шоген, поро пашаш ушнышо кажне еҥлан таум каласыме шуэш, – ойла Станислав Валерьевич.
2024 ий ноябрьыште С.Рябчиковым тазалык состояний дене запасыш уволитленыт. Марий Элыш пӧртылмекыже, ончычсо паша верышкыже пӧртылын. Фронтовой йолташ-шамыч дене кылым йомдарен огыл. Ты шучко жап пытымеке, иквереш погынен, кутырен шинчылташ лиеш дыр манын палдарыш тудо.
Шучко омо пӧръеҥлан кызытат конча, южгунамже пуйто тушман дрон поктылеш, нигузе шылын утлаш ок лий. Омо да оҥыштыжо чолгыжшо награде-влак неле пагыт нерген шарныктат.
Авторын фотожо.