Шукерте огыл «Шонанпыл» йоча передачым ямдылыше-влак Шӱргыял школыштына уна лийыч.
«Марий сылнымут садвечыште» кружокнан чолга тунемшыже-влак марий йылмым да йӱлам шуарен толмым веле огыл, а илышысе нелылык ваштареш шогымыштымат ончыктышт. Нуно Украина мландысе спецоперацийыште шке порысыштым шуктышо салтак-влаклан серышым возат, а У ийлан саламлымашан открыткым ямдыленыт ыле. Ӱдыр-рвезе-влак почеламутым лудыч, синквейным йоҥгалтарышт, тавалтен колтышт, мурымат муралтышт.
2022 ий йочан ушешыже могай шарнымашым коден, да 2023 ийыште могай шонымашышке шунеже – чылажат раш койо. Кружокын сай лектышыж дене старостына Стелла Кузнецова палдарыш. Олимпиадылаште сеҥымашке шумыж нерген Данил Белков, «Рвезе тукым» йоча ушемнан паша лектышыж нерген Дарья Корякова, «Дом без одиночества» проектым илышыш шыҥдарыме нерген Диана Скворцова, Архип Николаев, Тимофей Новиков каласкалышт. Кораксола ялын тале кидмастарже Софья Николаевна школна дене сай кыл улмым ойлыш.
Тунемше-влак, «Шонанпыл» передачыште шкеныштым ужмеке, моткоч йывыртеныт. Пеш кугу тау вӱдышӧ Людмила Фёдоровалан.
Елена Григорьева, кружок вуйлатыше.
Морко район.