Республикысе Тӱвыра, печать да калык-влакын пашашт шотышто министерствын коллегийжын заседанийже Кужэҥер районышто эртен.
Уло республик гыч тушко тарваныше тӱвыра пашаеҥ-влак ончыч Советский поселкышто да Кужэҥер поселкышто уэмдыме искусство школ-влакым ончал савырненыт.
— Ме ойыртемалтше жапыште илена: илыш чыла могырымат пеш вияҥ толеш, кече еда шуко сай вашталтышым эскерен, пиалан улмынам шижына, — ойлен республикысе тӱвыра, печать да калык-влакын пашашт шотышто министр К.Иванов. — Национальный проект-влаклан кӧра тӱвыра илышыште йӧршын у саманыш кусненна манын кертынна. Тудым шуктымо дене Марий Эл Россий мучкыжат ончыл верыште кая, южо ошкылым ме икымше ыштенна. Шуко оксам ойырымылан кӧра тынар олмыктымо пашам кӱчык жапыште нигунам ыштыме огыл.
Национальный проектлан кӧра Волжский, Шернур, Советский районлаште тӱвыра пӧрт-влакым олмыктен уэмдыме.
Сотнурышто, мутлан, 15,5 млн теҥгеаш пашам ыштыме, Вечыныште — 11,5 млн теҥге ойыралтын да молат. Но паша тидын дене ок мучашлалт, эше шуко вере нелылык уло, тидлан умбакыжат пашам ыштыман, сандене тыршаш гына кодеш.
Икманаш, тӱвыра илышыште усталык пашалан, йоча-влакым туныкташ чыла йӧн ышталтын, ышталтеш.
- 2021 ийыште 4 районышто модельный библиотекым ышташ 25 млн теҥге ойыралтын.
Эше ик сай ошкыл — самырык-влакым тӱвыра аланыш кумылаҥдаш 14 гыч 22 ияш-влаклан Пушкин картым пуат. Чылаже тиде проект почеш элна мучко 3.9 млрд теҥге ойыралтын.
Республикыште кызытеш 2500 еҥ тыгай картым налме.
Эдуард Иманаев.
