13 август Шолагай-шамычын тӱнямбал кечышт. Ты пайрем 1992 ий годсек палемдалтеш. Лудшына-влак коклаште шола кидан-влак улыт мо? Кузе пашаштым вораҥдат? Пурлагай ден таҥастарымаште ойыртемым шижыт мо?
Элина Пакеева, Шернур район:
– Шолагай улмылан кӧра нелылыкым вашлийын омыл. Мый МарГУ-што «Лечебное дело» направлений дене тунемам. Шукерте огыл хирургий занятийыште хирургий узелым кылдаш тунемынна. Тунам туныктышыланна шола кидан-влаклан кузе пидалтмым посна ончыкташыже логалын. Мый тыгак теннис дене модам. Тыште шолагай улмем мыланем полша, чыла гаяк теннис мечым налын кертам.
Шолагай лияш куштылго але неле манмаште, иктым каласен кертам: изинек кузе тунемалтеш, умбакыжат тугак кая. Мыланем гын чылажымат шола кид дене ышташ куштылго.