13 август Шолагай-шамычын тӱнямбал кечышт. Ты пайрем 1992 ий годсек палемдалтеш. Лудшына-влак коклаште шола кидан-влак улыт мо? Кузе пашаштым вораҥдат? Пурлагай ден таҥастарымаште ойыртемым шижыт мо?
Юлия Кузьминых, Йошкар-Ола:
– Школыштат, университетыштат тунеммем годым классыште да аудиторийыште окна да парт-влакым пурлагай-шамычлан веле келшен толыт манын шекланенам. Окна гыч волгыдо шола могыр гыч пурен, сандене ручка дене возымем годым шканем шке тулым авыренам. Тыгак возен кайыме годым кидем дене чыла ӱштылалтын да кидем пастылан кӧра кандалген. Тунам шола кидан-влаклан лӱмын ручка, вашкӱзӧ лийын огыл, сандене пурла кид дене шуко мом ышташ логалын.
Ондак ачам ден пелашем шола кид дене чыла ыштеныт, но вара нуным пурлагай лияш туныктеныт. Туге гынат вӱдышӧ кидышт садак шола кодын, южо пашам шола кид дене гына сайын ыштен кертыт. Шолагай лияш куштылго, южгунам гына иктаж нелылык лектеш, но чылажымат тӧрлаш лиеш. Тыгак мыланна келшыше канцтоварым кызыт ужалат.