Шокшо вӱд шокшо огыл. Тыгай годым шокшо вӱдым пуымо услугылан акым кузе уэш шотлыман? Роспотребнадзорын Марий Эл Республикысе управленийжын пресс-службыжо вашешта:
– Россий Правительстве 2011 ий 6 майыште 354-ше номеран пунчал почеш Шуко пачеран пӧртласе да илыме пӧртласе помещений шотышто собственник-влаклан услугым темлыме правилым пеҥгыдемден. Коммунальный услугым пуымо радам ты правил почеш шукталтеш. Правилын 31-ше пунктшо почеш, потребительлан, РФ законодательствын йодмашыж дене келшышын, сай да кӱлеш объёман коммунальный услугым пуыман.
2.1.4.2496-09 СанПиН-ын 2.4. пунктыштыжо ойлалтеш: шокшо вӱдын температуржо норматив почеш 60-75 градус лийшаш.
1992 ий 7 февральыште лукмо «О защите прав потребителей» законын 29-ше статьяж почеш, потребитель, ситыдымашым мумеке, ты услугылан акым иземдаш йодын кертеш. Тыгак услугым сайын огыл пуымылан эҥгек ышталтмылан оксам пӧртылташ йодаш праваже уло.
Правилын 98-ше пунктшо дене келшышын, «шокшо вӱд» коммунальный услугым кӱлеш огыл качестваным да (алe) кӱрылтыш дене (пеҥгыдемдыме жап деч шуко) пуымо годым, тыгак олмыктымо да профилактике паша-влакым шуктымылан кӧра палемдыме жап деч кужурак кӱрылтыш лийме годым расчётный жаплан коммунальный услугылан акым иземдышаш улыт, эсогыл потребительым оксам тӱлымӧ деч тӱрыснек утараш лиеш.
Доказательстве улмо годым услугылан акым угыч шотлымо шотышто мерым приниматлаш манын, пӧрт оза исполнитель деке каяш праван. Йодмым шке кумылын огыт шукто гын, потребитель 1992 ий 7 февральыште лукмо «О защите прав потребителей» законын 17-ше статьяже да РФ Гражданский кодексын 11-ше статьяж дене келшышын, шке правам аралаш судыш каен кертеш.