Самырык-влакын кечыштым палемдыме годым «Сердце матери» толкынын чолга еҥже-шамыч Йошкар-Оласе кок кумдыкышто тыршеныт.
Нуно «Мемнан-шамычлан ургена» да «СВО-лан пидына» мастер-классым эртареныт. Ты толкынын еҥже-шамыч ынде кум ий чарныде, уло чон-шокшыштым пыштен, передовойышто улшо салтак-влаклан тӱрлӧ семын полшаш тыршат. Ты сомылым нуно чон йодмо почеш ыштат. Тидлан ны жапым, ны тазалыкым, ны оксам огыт чамане. Кажне кечын, пашаш коштмо гаяк, лым лийде тыршат. Нуно тыге палемдат: «Ме салтак-шамычын шуктымо подвигыштым аклена. Кеч тыге полшен, сеҥымашым лишемдаш полшен кертына манын шонена. Тидлан уремлашке чӱчкыдын лектына, тыглай эртен кайыше еҥ-влаклан ответственность, полыш нерген умылтарена. Ме ӱшанена, порылык, икте-весым пагалымаш да йӧратымаш осалым сеҥаш полшат. Садлан ме чыланат ик шонымашан да пырля лийшаш улына!»
«Сердце матери» толкынын эртарыме мероприятийлашкышт поро чонан еҥ-влак ушненыт. Тыге, ик кылдышым весыш ушен, сеҥымаш деке корно лишемеш.
«Сердце матери» толкынын ВК-се тӱшкаж гыч налме фото.