Шоган шӱм эмла

Шоган шӱм кокырымо годым руным тӧргалтараш полша, карныктыш годым пайдале, шондым, шекшым луктеш, микробым пытара, вӱргорным пеҥгыдемда, организмым витамин дене пойдара.

Верге але шондыгалта чер уло? Кок стакан шокшо вӱдыш кум изи совла шоган шӱмым пыштыза да пел шагат шинчыктыза. Пӱсӧ цистит годым 50 мл дене кечеш кок гана кум-вич кече йӱман, хронический цистит годым  – кок кугу совла дене кечеш кум-ныл гана лу кечым.

Йолышто вӱргорно коршта, «звёздычко-влак» лектедат? 100 мл ош аракаш кок кугу совла шоган шӱмым пыштыза да шым кече шинчыктыза. Шӱрыза да 20 чӱчалтыш дене кечеш кум гана кочмо деч пел шагат ончыч йӱза. Але:  400 мл шокшо вӱдыш кок кугу совла шоган шӱмым пыштыза, куд шагат шинчыктыза, шӱрыза да ¼ стакан дене кечеш кум гана кочмо деч пел шагат ончыч 7-10 кече йӱза. Арня каналтымеке, уэш йӱаш лиеш.

Ангине чӱчкыдын витара? Шоган шӱман вӱд дене логарым шӱалтыза.

Нер йога? Ик стакан шокшо вӱдыш ныл кугу совла шоган шӱмым пыштыза да кум-вич минут парым шӱлыза.

Кокырымо годым кок стакан шокшо вӱдыш кок кугу совла шоган шӱмым пыштыза, 15 минут шолтыза да шӱрыза. Леве лемым ¼ стакан дене кечеш кум гана кочмо деч пел шагат ончыч йӱза.