Шоган тӱрлӧ амаллан кӧра кеҥежым нарынчалгаш тӱҥалеш. Тыгай азап кукшо игечылан, ӱяҥдыш ситыдымылан, тӱрлӧ копшаҥгылан да черлан кӧра лиеш.
- Шоган вӱдым огеш йӧрате, сандене тудым арнялан кок гана шавыман. Тыгодым ӱяҥдышым пуаш мондыман огыл. Ынже нарынчалге манын, азотан ӱяҥдыш кӱлеш. 10 литр вӱдыштӧ 30 грамм аммиачный селитрым, 40 грамм суперфосфатым, 20 грамм хлористый калийым шулыктарыман да шавыман.
- Шоган шӱяш тӱҥалын гын, шинчал раствор дене обработкым ыштыза. Тудо мландыште тӱрлӧ черым да копшаҥгым пытара. Ик ведра вӱдыштӧ 200 грамм шинчалым шулыктарыза. Тиде вӱдым шоган вожыш шавыза. Кеҥежым кум гана тыгай обработкым ышташ лиеш.
- Чеснок вӱд тӱрлӧ копшаҥгым пытараш полша. 1 литр леве вӱдыш 200 грамм тыгыдемдыме чеснокым пыштыза, вич кече шинчыктыза да вара шӱрыза. Ты растворым 10 литр вӱдыштӧ шулыктарыза да шавыза.