Шукерте огыл водитель-влакын профмастарлыкыштым тергыме конкурс эртаралтын.
Тушто Марий Элысе профессиональный тунемме организацийла (ссузла) гыч 10 студент таҥасен.
Участник-влак машинам технически обслуживатлымым, оравам вашталтымым, ДТП годым сусыргышо еҥлан икымше полышым пуымым да молымат ончыктеныт. Нуно корно движенийысе правил-влакым палымыштым практикыште кучылтыныт.
Тыгай конкурс кажне участниклан теорийым палымым, практикыште тудым чын кучылтмым да профессиональный мастарлыкым ончыкташ полша.
Икымше верым Автодорожный техникумын студентше М.Шевцов налын. Кокымшо верыш И.К.Глушков лӱмеш Оршанкысе шуко профилян колледжыште тунемше Р. Поярков да Автодорожный техникумышто тунемше Д.Мацкевич лектыныт. Кумшо вер дене Килемар районысо Арде профессиональный техникумын студентше А.Тарасов ден Марий чодыра озанлык техникумын студентше К.Афанасьев палемдалтыныт.
