Тыгай лӱман концертым эртара таче, 23 майыште, Марина Воронцова М.Шкетан лӱмеш Марий драмтеатрыште.
Тудо 2015 ийыште М.Щепкин лӱмеш кӱшыл театральный училищым тунем пытарыме деч вара тышке толын. Ынде лу ий уло кумылын тӱрлӧ рольым модеш. Утларакшым – лирический героине-влакым. Да моткоч сылнын мура.
ИЗИРАК КОНЦЕРТЫМ ЫШТЫЛЫН
Шернур район Чылдемыр ялын ӱдыржӧ изинек мураш йӧратен, садлан суртышто ача-ава уке годым шкетак, зритель деч посна, магнитофон почеш эре изирак концертым ыштылын. Ача-ава кадыргыл шогымым, кугун кычкыркалымым йӧратен огытыл. Купран школышто тунеммыж годымат нигӧ тудын яндар йӱкшым, мураш йӧратымыжым шекланен шуктен огыл.
Лач Шернур 1-ше №-ан кыдалаш школыш 10-шо классыш куснымекыже веле ӱдырын талантше тӱжвак лектын. Тунам туныктышо Лилия Владимировна Волкова йоча-шамыч деч кӧ мом ыштен моштымым йодын. Марина мураш йӧратем манын да «А-Студио» группын ик мурыжым мурен ончыктен. Туныктышыжо ӱдырым музыкым вӱдышӧ Лариса Аркадьевна Беликова деке намиен. Тыге Марина вокал дене заниматлаш тӱҥалын, ятыр конкурсыш ушнен, сеҥымаш-влакат лийыныт. Уло чон дене ты аланым йӧратен шынден.
«Мый илышыште вес профессийым онченат омыл, чонем эре мураш ӱжын. Садлан школ деч вара Палантай лӱмеш тӱвыра да сымыктыш колледжыш каенам. Ача-авамлан ты профессий пеш серьёзный гай чучын огыл, нуно ӱдырыштлан кӱшыл шинчымашым налыктынешт ыле, садлан эше заоч—но МарГУ-ш этнокультурологлан тунемаш пуренам», – ойла Марина.
Тӱвыра колледжыште тудо академический вокаллан тунемын. Тунамак ӱдыр классический музыкым чот йӧратен шынден, оперым колышташ чӱчкыдын театрыш коштын. Туныктышыжо, Марий Элын сулло артисткыже Галина Александровна Шабруковалан тачат таум ышта. Опер театрышкак пашаш каяш шонен, садлан тӱвыра колледж деч вара консерваторийыш тунемаш пураш ямдылалтын. Ала чынжымак Марина Озеева таче сай опер мурызо лиеш ыле. Но…
ЭХ, ТЫЙ, ПӰРЫМАШ
Колледжыште тунеммыж годым тудын эше ик йӧратыме предметшым, «Актёрын мастарлыкшым», М.Шкетан лӱмеш театрын артисткыже Маргарита Медикова вӱден. Тудо Маринан артист койышыжым шекланен шуктен да Москошко М.Щепкин лӱмеш кӱшыл театральный училищыш тунемаш пураш темлен, вет Маринан нылымше курсым пытарыме жаплан лач тушеч преподаватель-влак Йошкар-Олашке марий ӱдыр-рвезе-влакым погаш толыныт.
М.Воронцова экзамен-влакым сайын эртен, но садак Москошко каен да Шнитке лӱмеш музык институтыш, ГИТИС-ыш экзаменым кучен. Умбакыже профессионал мурызо семын вияҥаш шонен. Но нигушкыжат пу рен кертын огыл, чот кугу конкурсым эрташ кӱлын. Тыге пӱрымаш тудым М.Щепкин лӱмеш училищышкак конден. Тудым тунем лектын, Марина 2015 ийыште М.Шкетан лӱмеш театрыш пашаш толын. Кызыт Юмын тыгай савыртышыжлан таум веле ойла, вет шке пашажым, Шкетан лӱмеш театрым чотак йӧрата. Тыште шуко роль модалтын, утларакшым – тӱҥ роль-влак. Мотор йӱкшылан да профессионал семын мурен моштымыжлан кӧра М.Воронцова кажне мюзиклыште тӱҥ рольым модеш, театрын концертлаштыже да тӱрлӧ проектыште мура. Но тыгодымак тудо драматический роль-влакымат йӧрата, вет тушто актёр семын кушкаш сай йӧн уло.
АРИНАМ ШАРНЕДА?
Шарнеда, очыни, Марина эстраде аланыш 11 ий ондак Арина лӱм дене лектын ыле. Тунам тудым ме чотак пален огынал. М.Шкетан лӱмеш театрыш толмекыже, М.Воронцовам утларак палаш да аклаш тӱҥална. Вет тыште тудын талантше эше чот почылто: эстраде деч посна спектакльысе муро-влак (а нуно тӱрлӧ жанран улыт) репертуаржым вияҥдаш.
«Театр мурызо семын кушкашем сайын полша. Актёр пашаштем мыйын музыкальный образованием, мурен моштымем кӱлешан улыт», – ойла тудо.
ВИЙ—КУАТ СИТЫШЫН
Марина – моткоч шыма, ныжыл ӱдырамаш. Но тудын илыш сайынак терген. Москошто шинчымашым погымыж годымак пырля
тунемме рвезылан марлан лектын, кумшо курс деч вара ӱдыр йоча шочын. Изи ньогамак пелашыжын аваж дене коден, Москошко тунемаш каяш логалын да тылзеш ик гана ӱдыржым ужаш Йошкар-Олашке вашкен (Марина йочам ончаш полшымыжлан авалийшыжлан кызытат таум ойла). Самырык ава чон тунам изи икшывыж верч чотак вургыжын. Тидым кажне ава умыла, очыни. Тунем пытарымеке, кандаш тылзаш ӱдыржӧ дене декретыш каяш шонен, но вигак пашаш кычкалташ пернен: театрыште тудлан «Салика» спектакльыште тӱҥ рольым пуэныт, вара адак вес роль-влак почела лектыныт.
Самырык ава йӧратымашынат шере-кочышыжым шижын шуктен. «Тыгай чонлан неле пагыт годым ача-авам да лишыл йолташ ӱдырем эре пеленем лийыныт. Да, мутат уке, йӧратыме паша уто-ситым шонаш жапым пуэн огыл», – ойла Марина.
Кызыт ава пелен – йӧратыме Мирослава ӱдыржӧ. Тудат артист койышан. Мирослава изинек аваж пелен – театрыште. Тыштак кушкеш, манаш лиеш. Мӧҥгыштӧ эре мура-кушта, концертым ончыкта, аважлан рольым тунемаш полша, партнёржын рольжым модеш. Мурызо Светлана Яндукова деке мураш тунемаш коштеш, марла кушташ пеш йӧрата, ик жап школышто кушташ коштын. Сайын тунемаш тырша. Мира кеҥеж каникулым утларакшым ялыште кова-кочаж пелен эртара. Южгунам теҥыз воктеке миен толыт, Марина кечывалвелне канаш пеш йӧрата. Тушто вийым налеш, чыла паша деч каналта.
Театрыште Маринан ава ден ачажым, тыгак Валя акажым (Валентина Алексеевна Куклина, аважын акаже) чӱчкыдын ужаш логалеш. Нуно Маринан эн тӱҥ да эн кугу поклонникше улыт. Ача-аваж нерген тудо моткоч поро мут дене веле ойла, илышым чын умылаш, поро чонан лияш туныктеныт, манеш.
АЧА—АВА, ШОЛЬО
«Чылдемыр ялыштына кум пачеран кужу пӧрт уло. Иктыштыже ялсовет верланен, покшелныже – фельдшер пункт, а тудын воктене – мемнан пачерна. Авам Маргарита Алексеевна пенсийыш лекмешкыже, ты эмлымверыште фельдшерлан тыршен. Туддек еҥ-влак кеч-кунам толын тӱкалтен кертыныт, эре полшаш ямде лийын», – шарналта ӱдыр.
Марина ден Сергей шольыжын пӧртыштышт юарлен куржталаш тӱҥалмекышт, авашт фельдшер пункт гыч пырдыжым веле пералтен: йоча-шамыч тунамак шыпланеныт. Авашт нуным пеҥгыдыракын кучен.
Ачашт, Валерий Иванович Озеев, мӧҥгешла, пушкыдырак кумылан. Тудо ондак верысе «Земледелец» озанлыкыште шофёрлан ыштен, вара ик жап Москош коштын, ик аэропортышто телым трактор дене лумым шӱкен. А кызыт шочмо ялыштыжак шогылтеш. Шкенжын КамАЗ-ше дене тӱрлӧ грузым шупшыкта. Тракторжо дене пошкудо-шамычлан мландым куралеш, шудым сола да пога. Тений 18 майыште тудо 60 ийым тема.
А илыш ончыко кая. Оптимист койышан Марина Воронцованат ончыкылык планже шуко. А эн тӱҥжӧ кажне айдемылан – таза да пиалан лияш. Пиалан лияш чыла шотыштат: ава да пелаш, ӱдыр, йолташ семын, пашаште… Тек тыйын чыла шонымашет шукталтеш, сылне йӱкан марий актрисына.
Еш альбом гыч налме фото-влак.