«Шочын вочшо аза – ялт суксо», –

манеш Йошкар-Оласе Перинатальный рӱдерыште пашам ыштыше Эрвий Глушкова.

Фотошто – Эрвий Глушкова. Школ деч вара тудо Йошкар-Оласе медколледжыште тунемын, кызыт Перинатальный рӱдерыште пашам ышта. Ты гана Эрвий дене мутым вашталтенна.

Эрвий Глушкова Параньга район Руш Ляжмарий ялеш шочын-кушкын. Школышто руш йылме ден литератур урок-влак поснак келшеныт. Ӱдыр лудаш йӧратен, моторын сӱретлен. Школышто пырдыжгазетым ямдылаш кӱлын гын, тудын дек полышым йодын толыныт. 10-11-ше класслаште Эрвий марий йылме дене олимпиадылашке ушнен да кок ийынжат районышто икымше верым налын, варажым регион-влак кокласе кӱкшытыштӧ ончыл радамыш лектын.

Мыланем лӱмым ачам пуэн. Но изинек мыйым Эрвий огыл, Вика маныныт, мӧҥгыштат, школыштат. Эрвий улам гынат, Вика лӱм утларак лишылла чучеш, – манеш ӱдыр.

Изиж годым Эрвий туныктышо лияш шонен. Кугурак класслаште медицине аланыште пашам ышташ кумылжо лектын. Садлан школ деч вара Йошкар-Оласе медколледжыш тунемаш пурен. «Акушерское дело» специальностьлан кум ий тунемын. Но акушерке лийын огыл. Студентше годым Йошкар-Оласе перинатальный рӱдерысе йоча отделенийыште санитаркылан пашам ыштен. Дипломым налмекыже, туштак пашаш кодын. Варарак «Сестринское дело в педиатрии» специальностьлан тунемын да 2013 ий годсек тудо отделенийыштак – йоча постовой медшӱжар.

«Паша куштылго огыл. Но шочын вочшо изи падыраш-влакым ужатат, иканаште кумыл нӧлтеш. Отделенийыштына азам ыштыше ӱдырамаш-влак йочашт дене кият. Авам азам пелёнкыш вӱдылаш, мушкаш, чын пукшаш туныктена. Мӧҥгӧ колтымо деч ончыч темлымаш-влакым пуэна. Меак азам выпискылан ямдылена, чиктена да ачажлан изи пиал моклакам кучыктена, – каласкала Эрвий. – Пашанан вес шӧрынжӧ – документ-влакым ямдылымаш: журналыш возаш, йоча нерген данный-влакым компьютерыш пурташ. Икманаш, отделенийыштына паша шолеш. Ик кечыште южгунам 10 ӱдырамашым приниматлена, тынарымак выписатлена. Тиде жапыштак азам УЗИ-ш наҥгайыман, южо ньогалан фототерапийым ыштыман. Ава-влак тӱрлӧ йодыш дене полышым йодын толыт але, мутлан, пациентым вес отделенийыш кусарыман. Уколым, прививкым ыштыман, вӱрым анализлан налман – чыла тиде ик сменыште. Адакшым йочам ыштыше ава дене кутырен моштыман, сай психолог лийман, умылтарыман, лыпландарыман. Южгунам йӱдым 10 еҥым приниматлаш перна. Тыгай годым шинчын шортмо шуэш. Сменым пытарымеке, мӧҥгӧ толын пуремат, южгунам шонем: тиде чыла мыланем кӱлеш мо? Но, каналтымеке, лыпланем да умылем: мый кӱлешан пашам ыштем, тиде профессий чонемлан лишыл. Мутат уке, паша пеш ответственный, ятыр вий кая, пеш кугу чытышан лийман. Но коллективна сай, ваш полшена».

Эрвий – тыматле, еҥ-влак дене кылым вашке муын моштышо ӱдыр, весылан кужу жап сырен ок кошт. Яра жапыште книгам кучен шинчеш. Пашаж дене кылдалтше конференцийлаш, мастер-класслаш ушна. Куштылго огыл, но моткоч кӱлешан пашаштыже ӱдырлан чытышым да куштылго сменым тыланыме шуэш.