Кодшо каныш кечын «Россия 1» телеканал дене Андрей Малаховын «Песни от всей души» передачыштыже Ижевск ола гыч «Шочмо вож» коллектив усталыкшым ончыктыш. Ансамбльын участникше-влак Анастасия Бабикова ден Даниил Красильников такмак-влакымат мурышт.
«Шочмо вож» ансамбль нерген вуйлатышыже Карина Сайпышева каласкала:
– Коллективым Ижевск олаште Республикысе калык усталык пӧрт пелен 2022 ийыште чумырымо. Молан лач «Шочмо вож»? Ансамбльын икымше участникше-влак икте-весе дене родо улыт ыле. Нуным ик тукымвожышт да тыгак марий тӱвыра, йӱла ушеныт.
Кызыт ансамбльыш Удмуртий Республикысе Карагӧл район Пыргынде ден Шопкер ялла да Татарстан Республикысе Агрыз район Буймо ден Пелемеш селала, Кадрек да Кӱанэҥер ялла гыч 20 еҥ коштеш. Утларакшым – студент ден пашам ыштыше самырык-влак.
«Шочмо вож» ансамбль Ижевск олаште эртаралтше мероприятийлаште выступатла, шкеат усталык пӧртыштына концерт-влакым ямдылена. Пошкудо яллаш да селалаш концерт дене лектын коштына.
Репертуарыштышт – эрвелмарий-влакын куштымашышт, олыкмарий-шамычын икмыняр куштымашыштым пуртымо. «Шочмо вож» коллектив хореографический семын ышталтын, 2024 ий мучаш гыч мурышо да куштышо ансамбль семын – кугурак ийготан-влак вокальный группыш чумыргеныт.
«Песни от всей души» передачыш логалме нергенат К.Сайпышева палдарыш. Концерт, репетиций да моло мероприятий годым «Шочмо вож» ансамбльын выступатлымыжым видеош чӱчкыдын войзат. Видео-влакым ВКонтакте соцкылысе «Марий калык» группыш вераҥдат. А ты группым ансамбльын ик участникше Анастасия Бабикова вӱда. Лач тудо передачыште шке шочмо Кадрек ялже нергенат каласкалыш. Интернет аланыштак ансамбльым шекланеныт да передачыш ӱжыныт. Ынде «Шочмо вож» Россий мучко «шарлен».
Анастасия Бабикова:
– Татарстан Республик Агрыз район Кадрек ялыште марий ешыште шочынам. Шке калыкын тӱвыражым изинек пален кушкынам, эше йочасадыш коштмем годымак ялысе тӱвыра пӧртын сценыштыже выступатленна. Кызыт пелашем дене Ижевскыште илена, ик холдингыште маркетологын полышкалышыжлан пашам ыштем.
ВКонтакте соцкылыште «Марий калык» группым вӱдем, 11-ше классыште тунемше Катя шӱжарем мыланем полышкала. Группыш марий шӱлышан контентым вераҥдена. Видео-влакым шӱдӧ тӱжем наре еҥ онча, южыштым гын – миллион нареат. Тыге марий калык нерген Россий мучко веле огыл, вес элыште илыше-шамычат пален налыт.
Тылеч посна шӱжарем дене марий сынан сатум ыштена. Катя телефонышто стикер-шамычым ямдыла гын, мый марий сӧрастарыш-влакым шочыктем, марий шӱлышан футболко-влакым ямдылем. Шӱжаремын стикер наборжым, мутлан, Китайысе Шанхай олашкат колташ йодыныт, а мыйын сӧрастарышемым Кипрысе Лимассол олаште пижыктен коштыт. Шукерте огыл кугезе ковамын, Аськап Макаровна Асылбаеван, марий тувыржым уэмденам, кызыт тудым тӱрлӧ мероприятийыш чием.
Кок ий ончыч «Шочмо вож» ансамбльыш ӱжыныт, да мый уло кумылын келшенам. Коллективна самырык, чолга, икте-весылан эре полшена.
«Песни от всей души» передаче эфирыш лекмеке, соцкылыште тӱрлӧ комментарийым возкалаш тӱҥалыныт, мурен ом мошто манын койдаренат сереныт. Но мый палемдем: коллективна мурышо огыл, а куштышо. Москош мураш каен омыл. Садлан уда шонымашан комментарий-влак шӱмешем логалыныт.
Даниил Красильников:
– Шочынамже Удмурт Республик Карагӧл район Пыргынде ялыште. Ныл ияш улмем годым Титово удмурт ялыш илаш кусненна, садлан удмурт тӱвыра денат сайын палыме улам, школышто тунеммем годым удмурт хорыштат муренам.
Ижевскысе промышленный экономический колледжыште техник-электрик специальностьым налынам. Студент-активист лийынам, тӱрлӧ мероприятийым вӱдаш ӱшанат ыле. Кызыт нефть да газ скважине-влакым чоҥымаште пашам ыштем, мероприятий-влакым вӱдем.
2022 ийыште Карина Денисовна Сайпышева дене палыме лийынам, да тудын темлымыж почеш 2022 ийыштак «Шочмо вож» ансамбль шочын. Икымше кече гычак тушко ушненам.
Гармоньым шоктем, тидлан изиэм годымак тунемынам, но, туныктышем вес верыш илаш куснымеке, чарненам ыле. Кызыт ты семӱзгарым кидышкем чӱчкыдынрак налам.
Ансамбльын архивше гыч налме фото-влак.