Шочмо кундемым тӱзатыше, тудын верч тыршыше самырык еҥ-влакым чӱчкыдын вашлийына. Нуно ӧрдыж кундемыш лектын огыт кай, шочмо кундемыштат кӱлеш лийыт. Теве лач тыгай Курыкмарий район Пальтикäнäнгӹр ялеш шочын-кушшо Наталия Мастерова. Тудо районысо тӱвыра пӧлкам нылымше ий вуйлата. Шочмо калыкшын йӱлажым, муро поянлыкшым, тӱвыражым аклен ила, калыкше дене кугешна.
Уста ӱдыр
Наталия изинек усталык шӱлышан, мураш-кушташ йӧратыше кушкын. Эмäн школышто тунеммыж годым музыкальный школыш кӱслем шокташ коштын. Варажым 7-ше класс деч вара Козьмодемьянск оласе талантан йоча-влаклан школ-интернатыште тунемын да мастарлыкшым нӧлтен толын.
Кушкын шуын, кӧ лийшашым, могай корно дене кайышашым Наталия изинек пален. Туныктышо профессий чонжым сымыстарен, тыгодым администрацийыште иктаж гана ыштен ончаш шонен. Йоча годсо шонымаш таче шукталтын, манаш лиеш.
Тудо И.С.Палантай лӱмеш тӱвыра да сымыктыш колледжыште дирижёрлан, Чебоксар оласе И.Я.Яковлев лӱмеш кугыжаныш университетыште музыкым туныктышылан тунем лектын. Пистерлä селасе школышто йоча-влаклан музыкым туныктен, Козьмодемьянск оласе 5-ше №-ан йочасадыште музыкальный вуйлатышылан тыршен. А таче тудо районысо тӱвыра аланлан вуйын шога.
– Кушто тыршенам, мыланем чыла вере келшен. Таче ответственный пашам шуктем, вет тӱвыра илышым чыла могырымат палыман. Но мый тӱрлӧ йодышым рашемдаш, кугу мероприятийым эртараш йӧратем.
Курыкмарий кундемна кӱслеже, вургемже, фольклоржо, шке брендше дене ойыртемалтеш. Теве кызыт сувенир шотеш ӱштым ямдылена. Тудо Марий Элын брендышкыже пура. Тыгак кундемыштына шуко коллектив уло. Нуно конкурслаште ойыртемалтыт, Гран-прим чӱчкыдын налыт.
Районышто кызыт 23 тӱвыра учреждений, 19 книгагудо, ик тоштер, кок сымыктыш да музыкальный школ-влак улыт. Пашана мурымаш да куштымаш дене гына кылдалтын огыл, тыгак тӱвыра учрежденийлаште ачалыме пашам шуктена. Мутлан, южо тӱвыра пӧрт леведыш гыч вӱд чыпчен йога. Ты нелылыкымат команде дене тӧрлена, – мане Н.Мастерова.
Тӱрлӧ пашам ыштат
Курыкмарий районышто кажне ийын тӱрлӧ мероприятийым, пайремым эртарат. СВО-што колышо сарзе-влакым шарныме лӱмеш октябрь мучаште экспозицийым чумырымо. Ты пашашке нунын ача-аваштымат ушымо. Ноябрь тӱҥалтыште Козьмодемьянск олаште кинозалым почыт.
– Тиде кечылаште районышто клубысо тургымым почна. Эн кугу мероприятий шотеш «Мыры» фестиваль-конкурсым палемдем. Тудо кажне ийын эртаралтеш. Тений 15 ноябрьыште участник-влакын мурымыштым колышташ тӱҥалыт. Декабрь тӱҥалтыште икымше тур лиеш, варажым – гала-концерт. Регион-влак кокласе «Пеледыш айо» муро пайремымат эртарена.
СВО-што колышо-влак лӱмеш экспозицийым ямдылаш куштылгыжак огыл. Чоным корштара, кумылым волта, шинчавӱдым луктеш. Ты пашам Салымсола ялыште верланыше Никон Игнатьев лӱмеш тоштер дене пырля шуктена.
У кинотеатрым ме кинофондын полшымыж дене почына. Тудым ме курыкмарий режиссёр, кинооператор Анатолий Амельченко лӱмеш «Юнгафильм» манынна. Залыште ончаш толшо-шамычлан 35 верым ыштыме. Тыште еҥ-шамычлан кӱчык метражан фильм-влакым ончыкташ тӱҥалыт.
Туризм паша нелын кая. Тидыже маршрут-влакын икте-весышт деч пеш тораште верланымышт дене кылдалтын. Мутлан, южо верыш кудалаш ныл шагат кая. Сандене мемнан деке шагал турист коштеш, – палемдыш Н.Мастерова.
Курыкмарий кундемыште шочмо йылмым тунемаш кумылаҥше-влакат шукын улыт. Тидын шотышто Н.Мастерова самырык ӱдыр-рвезе-шамычым поснак палемдыш. Йылмым тунемме курсымат эртараш йодыт.
Тыгайрак тачысе лаштыкнан геройжо. Чолга, самырык да илыш дене тӧр кайыше, шонымашке шушо. Шке пашажым тыршен ышта, районысо тӱвыра илыш ончыкыжымат тӱзланыже манын шона.