15 мартыште Марий кундемын чапланыше эргыже Андрей Яковлевич Эшпайын шочмыжлан – 95 ий.
Композитор, пианист, туныктышо, мер пашаеҥ, Совет ушемын калык артистше (1981), СССР кугыжаныш премийын (1976), Ленин лӱмеш премийын лауреатше (1986) Андрей Яковлевич Эшпай 1925 ий 15 майыште Козьмодемьянск олаште шочын. Ачаже – марий кундемын чапланыше эргыже, композитор, музыковед-фольклорист Яков Эшпай, а аваже калык мурым палыше, мураш йӧратыше Валентина Тогаева.
1928 ийыште Эшпаймыт еш Москваш илаш куснен. Андрей изиж годсек ачаж деч музыклан тунемын. 1941 ийыште тудо Гнесин-влак лӱмеш музыкальный йоча школым тунем пытарен. Эвакуаций жапыште Чувашийысе Мариинский Посад оласе 1-ше номеран школышто тунемын.
Сар тӱҥалмеке, Андрей Яковлевич шке кумылын фронтыш колташ йодын, но ийгот дене изирак улмыжлан кӧра тудым налын огытыл. 1943 ийыште Чкаловский пулемётный училищыш пурен, Йошкар Армий институтын военный переводчик-влакын курсыштым тунем пытарен. 1944 ий гыч 1-ше Белорусский фронтышто кредалын. Йошкар шӱдыр орден дене наградитлалтын. 1945-ше ийыште 9 майым Берлин олаште вашлийын.
Сар деч вара А.Эшпай Москосо консерваторий пелен музыкальный училищыште тунемын. 1953 ийыште Москосо консерваторийым пытарен.
1965-1970 ийлаште пианино дене шке произведенийже-влакым шоктен, тыгак Москосо консерваторийште туныктен.
1973-1979 ийлаште – РСФСР композитор ушемын икымше секретарьже, 1996-2001 да 2006-2015 ийлаште Российысе авторский обществын президентше лийын.
Андрей Эшпай тӱня мучко тӱрлӧ конкурслаште конкурсант, пианист, жюри член семын выступатлен. Тудо симфоний ден балет-влакын, камерный пьесе-влакын, оркестрын чыла семӱзгар-влаклан концертын авторжо. Андрей Яковлевич эстраде семымат возен, 60 утла фильмлан мурыжо уло.
Андрей Эшпай шочмо кундемжым моткоч йӧратен. Кажне ийын тудо республикышкына толаш тыршен, тысе оркестр дене концертым шынден, композитор да студент-влак дене вашлийын.
Андрей Яковлевич – Йошкар-Олан гимнжын авторжо. А «Марий сандалык» мурыжо уло марий калыкын гимнышкыже савырнен. Тудо марий композитор-влаклан пример лийын, шуко самырык еҥым сем тӱняшке ужатен. А.Эшпайын лӱмжым Козьмодемьянск оласе сымыктыш школ нумалеш.
Марий АССР сымыктышын сулло деятельже, Марий АССР-ын калык артистше, Йошкар-Олан да Козьмодемьянскын почётан гражданинже ош тӱня дене 2015 ий 8 ноябрьыште чеверласен. Тудым Моско оласе Новодевичье шӱгарлаште тойымо.