Самырык еҥ-влак чолга, чыла вере шуаш тыршыше улыт. Йӧратыме сомылым ойырен налмеке, эше чот вашталтыт. Паша нунылан вий-куатым ешара, чоныштым пойдара. Тыге шкештат пиалан лийыт, молыланат кугу пайдам кондат. Тыгай-влак кокла гыч иктыже – Ксения Резвых.
Чыла могырым шуаралтын
Ксения Морко район Тойметсола ялыште ныл шочшан ешыште шочын-кушкын. Кумыжъял кыдалаш школышто шинчымашым поген. Тунемме верыште эртаралтше тӱрлӧ конкурсышто, мероприятийыште эреак участвоватлен.
– Руш йылме, математике да информатике предметла дене районысо, республикысе олимпиадылаште уш-акылем тергенам. Тыгак марий литературлан шӱман лийынам, сандене республикыште тӱрлӧ кӱкшытан конкурсыш ушнаш тыршенам. 7-9 класслаште Осипсола тӱвыра пӧртысӧ «Изи мӱкш» йоча ансамбльыш коштынам. Ансамбльыштына кандаш ӱдыр лийынна. Ме марий да удмурт куштымаш-шамычым куштенна. Шукыж годым районышто выступатленна, – ойла Ксения.
Индешымше класс деч вара Йошкар-Оласе строительный техникумышто «Экономика и бухгалтерский учёт» направлений дене ныл ий тунемын. Вара шке профессийже дене Морко районысо тӱвыра пӧлкаште кок ий тыршен.
Йоча-влак дене
Кызыт Ксения Морко районысо туныктымо пӧлкаште самырык-влакын пашашт шотышто экспертлан визымше тылзе тырша. Ойлымыж почеш, у паша тудлан моткоч келша.
– Мый 14-18 ияш ӱдыр-рвезе-шамыч дене пашам ыштем. Нунылан план почеш тӱрлӧ модышым, конкурсым ямдылем да вӱдем, тыгак республикыште эртаралтшаш мероприятийыш ужатем. Ӱмаште сентябрьыште Моркышто «Новые реалии – новые возможности» молодёжный форумым ыштенна. Тушто тӱрлӧ мастер-класс, квест, вашлиймаш лийыныт, тыгак маскироватлалтме сеткым пидаш, проект пашам возаш туныктеныт. Ноябрьыште «Бей в набат!» профилактический мероприятийым эртаренна. Декабрьыште военно-патриотический слётыш миенна. Тений январьыште оборонно-массовый да военно-патриотический паша месячникым почмаште лийынна. Февраль тӱҥалтыште Кугу Отечественный сарыште сеҥымылан 80 ий темме лӱмеш допризывной молодёжьын спартакиадым эртарен колтышна. Программе почеш рвезе-влак пневматический винтовко гыч лӱйкаленыт, перекладиныште капыштым, а вара кирам нӧлтеныт, ече дене 5 меҥгым куржыныт, – палдара К.Резвых.
Йоча-влак дене пашам ыштет гын, нунылан сай примерым ончыктыман. Ксения тидым пала, сандене нуным шкеж гаяк пашаче, чолга лияш туныкта. Тӱрлӧ форумыш, конкурсыш ушна, тушто уш-акылжым пойдара, шуаралтеш, улан тунемеш.