У Торъял районлан тений – 100 ий. Кузе тудо лӱмгечым палемдаш ямдылалтеш, яллаште могайрак илыш? Тидын нерген У Торъял муниципальный образований вуйлатыше Евгений Викторович Небогатиков дене мутланена.
Шке гыч тӱзатат, ачалат
У Торъял районыш вич поселений пура: У Торъял, Какшанмучаш, Чӱксола, Масканур да Тошто Торъял. Районышто вич тӱжем наре еҥ ила. Нунын кокла гыч 30 процентше – тиде самырык-влак. Ялозанлыкым вуйлатыше-шамыч рвезе еҥлан пашам, илыме верым пуат, сандене самырык тукымлан ялыште илаш сай йӧн уло. Рвезе калык пӧртым чоҥа, ешым чумыра, нунын коклаште шуко шочшан-влакат улыт. Шочмо верыштым эреак сӧрастараш тыршат.
– Ялысе калык шукыж годым, шке гыч чумырген, шочмо вержым тӱзата. Тидлан тӱрлӧ проектым возат, ял шотан илем администрацийлаш йодыш дене лектыт. Мутлан, Шӱвылак ял калык шке гыч оксам поген да корным ачален, каныме верым ыштен. Кок ий ончыч ял тӱҥалтыште Кугу Ачамланде сарын участникше да тыгак труженник-влаклан пӧлеклалтше стелым шогалтен. Тыгаяк стелым Элеволкышто вераҥденыт, ял мучко тулым шупшыныт. А Купсолаште гын Кугу Ачамланде сарын ветеранже-влаклан, чечен-афган да пограничник-влаклан пӧлеклалтше кугу комплексым ыштеныт. Старосто-шамыч моткоч пашаче улыт, калык дене пашам сайын шуктат, поснак газым пуртымо годым ойыртемалтыныт, – палдара Е.Небогатиков.
Программын лектышыже
Кызыт шке кундемыште тӱрлӧ йодышым решатлымашке ушнаш шуко йӧн уло. Мутлан, «Верысе инициативе» программе почеш У Торъял посёлкышто илыше еҥ-влак проектым возат, тудым аралат да илышыш шыҥдарат.
– Ты программе почеш Тошто Торъял шӱгарлаште печым печеныт. Пектубайыште тулым шупшыныт. У Торъялыште Советский уремыште йоча-шамычлан площадкым ыштеныт, тушто футболла, баскетболла да волейболла модаш посна вер уло.
«Комфортная городская среда» программе почеш У Торъялыште Советский уремыште асфальтым шареныт, тротуарым ыштат. Шӱвылакыште, Кузнечыште да Лумарийыште йоча садлаш газым пуртат.
Токтарсолаш кайымаште кӱвар уло, тудым «Безопасные качественные дороги» программе почеш олмыктат. Масканурышто корно ышталтеш.
«Нацобразований» проект почеш Тошто Торъялыште, Лумарийыште йоча сад-влакым да Кӱан Памашыште школ-интернатым олмыктат.
2012 ийыште Капкультур да тазалыкым пеҥгыдемдыме комплексым нӧлташ тӱҥалыныт. Тений ты пашам мучаш марте шуктеныт, – ойла Е.Небогатиков.
100 ий темеш
17 августышто У Торъял район 100 ияш лӱмгечым палемда.
– Ты кечын тӱрлӧ площадке пашам ышташ тӱҥалеш. Тӱвыра пӧрт, Йоча усталык рӱдер, книгагудо модыш программым ямдыленыт. Пайрем кышкарыште лӱмлӧ еҥ-шамычым, почётан гражданин-влакым палемдена. Идалыкын лектышыжым рашемдена, – мане Е.Небогатиков.
У Торъял тӱшка гыч налме фото.