Кызыт яллаште тӱвыра пӧрт-влакым олмыктат. Верысе ансамбльлашке ялыште илыше ятыр еҥ ушнаш кумылан.
Кундемыштына ялысе тӱвыра пӧрт пеленысе ансамбль-влак шке районыштын чапшым тӱрлӧ вере кӱшнӧ кучат. Нуно шке мастарлыкышт дене концертым, фестивальым да моло мероприятийым сӧрастарат.
Тений шошым Советский районысо Кужмарий селаште шочын-кушшо Эльмира Усова шке шочмо кундемысе тӱвыра пӧртыш пашам ышташ толын. Самырык специалист тыгак Советский посёлкысо тӱвыра полатыште йоча-влак дене паша секторым вуйлатышылан тырша да «Канарейка» ансамбльым вӱда.
Мастарлыкшым изинек тапта
Ӱдыр шке селасе тӱвыра пӧрт пелен шуаралт кушкын.
– Тӱвыра илыш мыланем пеш палыме. Шочмо селасе клубышто изинекак мураш-кушташ тӱҥалынам. Шымше классыш шумеке, «Эр ӱжара» ансамбльыш ушненам. Ты ансамбль дене ятыр концертым ончыктенна, шуко мероприятийыш лектын коштынна. А индешымше класс деч вара Йошкар-Оласе Палантай лӱмеш тӱвыра да сымыктыш колледжыш тунемаш пуренам. Тыгодым верысе ансамбльыштат шуаралтынам, вет кажне каныш кечылаште шочмо кундемыш кудалыштынам, – каласкала тӱвыра пашаеҥ.
Эльмира Усова «Мурпамаш» да «Соседушки» ансамбль-влакын участникыштым мураш туныкта, тыгак тӱрлӧ куштымашым да постановкым шындымаште полышкала.
– Ансамбльыш Алисола, Кӱверсола, Яштыродо, Кугу Почиҥга ялла гыч коштыт. Тыгак самырык-влакат улыт. Нуно Йошкар-Олаште илат але пашам ыштат. Садлан йӧн да жап лийме годым клубыш репетицийыш толыт, – палдара Эльмира.
А Советский посёлкыш (Кужмарий села гыч райрӱдӧ марте 20 утла меҥге лиеш) кажне кечын газель дене кудалыштеш.
Калык дене кылым ыштыман
Специалистын ойлымыж почеш, тӱвыра пашаеҥ тыгак верысе калыклан тӱрлӧ пайремым да мероприятийым организоватлышаш да эртарышаш. Тидыже концертым ямдылымаш, тематический ончерым чумырымаш, пайремым сылнештарымаш, усталык касым сӧрастарымаш да молат лийын кертыт.
– Тылеч посна верыс калыклан (кеч-могай ийготан) усталыкыштым пеҥгыдемдаш полшышаш улына. Тидланже кружокым келыштаренна, ансамбльым чумыренна. Нунын дене шке калыкнан йӱлажым да тӱвыражым арален кодымо шотышто кугу пашам виктарена. Кугу тӱткыш фольклорлан ойыралтеш. Вет республикыштына кажне районын ты шотышто шке ойыртемже уло, – палемда специалист.
Кажне профессийын шке ойыртемже: сай да уда могыржо уло. Тӱвыраштат – тыгак. Тидлан, очыни, эн ончыч калык дене пашам ыштен моштыман да уста шӱлышан лийман. Вет мероприятийым организоватлаш, тудым эртараш, тыгодым кажне кырча-марчалан тӱткышым ойыраш куштылгыжак огыл. Тидымак палемда профессийже шотышто Эльмира. Тудо тыге манеш:
– Мыланна кажне еҥ дене кылым муын моштыман. Лийже тиде шоҥгыеҥ але изи йоча, ялысе але оласе, туныктышо але доярке. Тыгодым кумылыштым савырен, чоныштышт волгыдым ылыжтен сеҥыман. Тидым шке пашажым йӧратыше еҥ веле ыштен кертеш.
Шукерте огыл Кужмарий селасе В.Бурлаков лӱмеш тӱвыра пӧртым капитально олмыктеныт. Уэмдыме клуб омсажым кугу мероприятий дене почын. Тӱвыра пашаеҥ-влак районысо гармоньчо-шамычлан «Под однорядку» фестивальым эртареныт. Ты мероприятий Советский районышто кокымшо гана лийын.
Тугеже ты селасе клубышто илыш шолеш. А самырык специалист-влакын толмышт, кундемысе тӱвырам нӧлтымаште, ансамабль-шамычым вияҥдымаште сай полышым ышта. Эльмира Усован мастарлыкше тидым ышташ ситыше манын ӱшанена.
Эльмира Усован альбомжо гыч налме фото.