Автор Раисия НИКОЛАЕВА.
15 февральыште «Шочмо йылме – калык поянлык» йоча фестиваль Йошкар-Олаште Калыкле сымыктыш гимназийыште лиеш, 10 шагатлан тӱҥалеш. Тудо Шочмо йылмын тӱнямбал кечыжлан да Ешын идалыкшылан пӧлеклалтеш.
Мероприятийым Тӱвыра, печать да калык-влакын пашашт шотышто министерствын да И.С.Палантай лӱмеш Тӱвыра да сымыктыш колледжын калыкле сымыктыш гимназийжын полшымышт дене Марий тӱвыра рӱдер эртара.
Тӱвыра-туныктыш мероприятийыш самырык мер ушемын еҥже, школлаште да вузлаште тунемше, магистрант, аспирант ден туныктышо-влакым пагален вучат. Эн ончыч йоча да уна-влаклан марий йылме да тӱвыра урок эртаралтеш. Тушто Йошкар-Оласе да районласе туныктышо-влак шочмо йылмын ямже, марий сылнымутым тӱшкан лудын каҥашыме йӧн нерген каласкалат, марий литератур урокышто кейс технологий дене пайдаланыме йӧн, пагытлан да пайремлан келшыше марий модыш дене палдарат. Тыгак «Самырык тукым марий йылмым кучылтеш мо?» дискуссий сынан урок лиеш.
Гимназийын актовый залыштыже марий драматургийыште, сылнымутышто, фольклорышто, эстрадыште да СМИ-ште марий йылмым кучылтмо нерген марий шанчызе, журналист-влак каласкалат. Марий йоча коллектив-влакын муро да куштымашышт марий концертым сӧрастарат.