Волжский районысо Пӧтъял школыш тений 13 йоча икымше классыш каен. 1 сентябрь кечын кажныжлан школын ончычсо выпускникше-влак Эдуард Иманаев ден Владимир Матвеев Марий калык конгресс лӱм дене республикыштына шукерте огыл савыкталт лекше «Пырля лудына» да «Марий калыкын илыше азбукыжо» книгам кучыктеныт.
Тений школлаште 1 сентябрь пайрем молгунамсе деч ойыртемалтшын эртен.
Волжский районысо Пӧтъял школ ончылно 1-ше классыш тунемаш толшо да латикымше классыш вончышо тунемше-влак гына погыненыт ыле. Но пайрем нимыняр шӱлыкын эртен огыл. Вет тышке тунемше-влакым саламлаш республикнан тӱрлӧ кундемлаж гыч уна-влак миеныт. Школ вуйлатыше В.Семёнов нуным вашлийшыжла, куан кумылжым ыш шылте. Тунемше-влакым саламлыш, вирус деч шекланаш, но лӱдаш огыл, утларак тыршен тунемаш, туныктышо-влаклан устан пашам ышташ тыланыш. Да мутым Марий Эл Кугыжаныш Погын вуйлатышын алмаштышыже, В.М.Васильев лӱмеш МарНИИЯЛИ директор Е.Кузьминлан пуыш.
— Тиде кече волгыдо да куаным кондышо пайрем. Икшыве-влакым изиш тургыжландара, а кугурак-влаклан эртыше йоча пагытым шарныкта. Поснак икымше гана парт коклаш шичше-влаклан таче куанле. Ӱшан дене да кугешнен каласем нунылан: те районын але республикын гына огыл, кугу элнан ончыкылыкшо улыда. Чын корным ойыраш да сай шинчымашым налаш тыланем, — мане Евгений Петрович да школ директорлан пашаште кучылташ кок томан «Рушла-марла мутерым» кучыктыш.
Район администраций велым тунемше да туныктышо-влакым Волжский муниципал образованийым вуйлатыше, районысо депутат-влак погынымашын председательже, «Единый Россий» партийын районысо пӧлкажын секретарьже В.Сергеев саламлен.
Шинчымаш кече пайремлан икымше йыҥгырын йоҥгалтмыже утларак куан шӱлышым пурта. Пӧтъял школышто оҥгыр йӱкым лукташ икымше классыш кайыше Полина Васильева ден 11-ше классыште тунемше Евгений Ивановлан ӱшаненыт ыле.
Кӱчык пайрем линейке деч вара Сотнур селасе Свято-Троицкий черкын настоятельже Игорь ача чыланыштым юмынвӱд дене чывылтен, осал деч аралалташ, ок кӱл паша деч шекланаш да поро дене илаш сугыньлен.
Икымше классыш кайыше-влак нуным куан дене вашлийше туныктышышт В.Чугунован вӱдымыж почеш школ омсам вонченыт, парт коклаш шинчыныт.
Школ администрацийын ямдылыме альбом, карандаш, ручка деч посна нуным эше уна-влак деч посна пӧлек вучен. Пӧтъял школын ончычсо выпускникше-влак — Э.Иманаев, кызыт тудо «Кугарня» газетын тӱҥ редакторжо, Марий калык конгрессын председательже да В.Матвеев, конгресс исполкомын вуйлатышыже, Марий Эл Радион тӱҥ редакторжо – 13 тунемшылан республикыштына шукерте огыл савыкталт лекше «Пырля лудына» да «Марий калыкын илыше азбукыжо» книгам кучыктеныт.
– Тиде кече поснак шарналт кодшо, ончыкыжым тунемаш утларак кумылда лийже манын, ме тыланда тыгай пӧлекым ямдыленна. Ончыкыжым шуко предмет-влакым, тӱрлӧ йылмым тунемаш тӱҥалыда. Руш, англичан, француз эсогыл китай йылмымат кызытсе саманыште чыла вере гаяк туныктат. Но тыгодымак те эн ончыч шке шочмо марий йылмыдам сайын палышаш, йӧратышаш да куанен тунемшаш улыда. Лач тиде амал дене ме тыланда икымше букварьым кучыктена, — манын палемденыт толшо уна-влак.
Ончычсо выпускник-влакын пӧлек дене толмышт тунемше-влакым веле огыл, школ коллективымат куандарен.
Л.ЕВСЮТКИНА.
Авторын фотожо.
