
28 январьыште Марий кугыжаныш университетыште Калыкле тӱвыра да тӱвыра кокласе коммуникаций институтышто 9-11-ше класслаште тунемше-влаклан марий йылме да литератур, марий кугыжаныш йылме, ИКН предметла дене олимпиаде-влакын республикысе йыжыҥже эртаралтын. Тушко районласе ден олаласе школлаште сеҥышыш лекше 106 тунемше ушнен.
Сеҥыше-влакым палемдыме:
Шочмо марий йылме дене 9-ше классыште тунемше Максим Степанов (Морко район Унчо школ) сеҥышыш лектын, 10-шо классыште – Валерия Кузьмина (Курыкмарий район Пайскырык школ), 11-ше классыште – Дарья Загайнова (Советский район Кельмаксола школ).
Кугыжаныш марий йылме дене ойыртемалтыныт: 9-ше классыште – Мария Петухова (Калыкле сымыктыш гимназий) да Александр Медведев (Йошкар-Оласе шуко профилян лицей-интернат), 10-шо классыште – Карина Ванюкова (Козьмодемьянск оласе С.Н.Сивков лӱмеш 3-шо №-ан школ), 11-ше классыште – Екатерина Чурикова (2-шо №-ан Кужэҥер школ).
ИКН предмет денат паша лектыш тӱвыргӧ. 9-ше классыште эн шуко баллым Всеволод Кузнецов поген (Кужэҥер район Шӱдымарий школ), 10-шо классыште – Дарья Овсянникова (Козьмодемьянск оласе лицей), 11-ше классыште – Артур Долгоруков (Козьмодемьянск оласе лицей).
Марий литератур дене эн шуко баллым 9-ше классыште тунемше Алена Архипова (Параньга район Матародо школ) поген, 10-шо классыште – Дина Павлова (Морко район Унчо школ).
Каласыман: 18 февральыште нине предметла дене регион-влак кокласе йыжыҥ лиеш. Тушто республикысе олимпиадыште сеҥышыш лекше-влак таҥасаш тӱҥалыт. Тыгак моло кундемла гыч ӱдыр-рвезе-шамыч вийыштым тергат.
МарГУ-н ВК-се тӱшкаж гыч налме фото.