9-10 июньышто Йылмым, литературым да историйым научнын шымлыше В.М.Васильев Марий институтышто «Марийская традиционная религия: история и современность» научно-практический конференций лийын. Тудо Российысе калык-влакын тӱвыра поянлыкышт идалыклан пӧлеклалтын.
Кок ий ончыч тыгай конференций регион-влак кокласе кӱкшытыштӧ эртен гын, ынде уло Россий: Марий Эл, Башкортостан, Татарстан, Мордовий, Удмурт да Чуваш Республикла, Свердловск, Пермь кундемла, Моско, Пенза, Самара олала – гыч 90 утла еҥ ушнен. Конференций годым Марий Эл Республикысе кугыжаныш архивын «Древняя вера народа мари» ончержым вераҥдыме лийын.
Кум секций, пленарный заседаний пашам ыштеныт. Пленарный заседанийыште кум доклад йоҥгалтын. МарНИИЯЛИ-ште «Археологий» направленийыште тыршыше тӱҥ пашаеҥ Татьяна Никитина «Погребально-поминальные традиции марийского народа в эпоху средневековья» докладыштыже айдемым ожно кузе тойымо нерген каласкален. Институт пеленысе междисциплинарный шымлымаш лабораторийын тӱҥ шанче пашаеҥже, филологий шанче доктор Любовь Абукаева «Аудиокорпус текстов марийских молитв: проблемы и перспективы создания» докладыштыже марий кумалтыш мутын ойыртемже нерген палдарен. А Удмуртий Республик гыч профессор Надежда Шутова «Священные места марийцев Удмуртии и удмуртские капища: проблемы изучения» докладым лудын.
Морко район Унчо школышто 10-шо классыште тунемше ӱдыр-рвезе-влак «Ӱдыр сий» фольклорно-этнографический композицийым ончыктеныт.
Секцийлаште оҥай теме-влакым тарватеныт. 10 июньышто чыланат Советский посёлкышко Курык кугыза лӱмеш кумалтышыш лектыныт.