АВТОР — Любовь Михайлова
Татарстан кундем Агрыз районысо тӱвыра полатыште «Любовью к Родине дыша…» поро кумылым ончыктымо концерт лийын. Тудым мобилизоватлыме землякыштлан да нунын ешыштлан полшаш манын эртареныт.
Концертыште Агрыз районысо чыла марий ялласе клуб-влакын коллективышт: гармоньчо-влакын «Йоҥгалт, гармонь йӱк!» ансамбльышт, Буймо гыч «Эр ӱжара», Пелемеш гыч «Ош вис-вис», Кӧлегеш гыч «Курмызак олык» ансамбль-влак да молат – выступатленыт.
Концерт Еш идалык дене кылдалтын. Владимир ден Ирина Осиповмытын, Владимир ден Оксана Корневмытын, Василий ден Оксана Петровмытын, Эдуард ден Эльвира Капаровмытын мурымышт чонышкак логалын.
Марий усталык коллектив-влак Агрыз районысо лишыл яллаштат выступатленыт. Шукерте огыл Одо кундемысе Старая Салья селаште лийыныт.
Татарстан кундем.