Республикысе изосымыктыш тоштерыште «Край марийский» ончер 1 ноябрьыште почылтын. Ты гана 46 сӱретче ден декоративно-прикладной сымыктышын мастарже-влакын пашаштым ончыктымо.
Марий тӱс
Утларакшым автор-шамыч пейзаж ден натюрмортым темленыт. Тыгак марий калык дене кылдалтше радына-влакымат ужна. Российын сулло сӱретчыже И.Ямбердовын кум пашаж гыч иктыже Чумбылат курыклан пӧлеклалтын. Тений Россий художник ушем радамыш пурышо И.Станын ончерыш кок картиныже логалын, иктыжым марий мифологий почеш сӱретлыме да «Чодыра Юмо» манын лӱмдымӧ. Марий Эл тӱвыран сулло пашаеҥже М.Клюкина «Лебёдушка Йӱкталче» йомак книгалан ямдылыме ныл иллюстрацийжым темлен.
А керамист-сӱретче Полина Метелькова «Край родной» талиҥга серийым ончыкта. Кодшо кечылаште ты пашажым кӱкшын аклыме рашемын: тидым кугыжаныш премий дене палемдыме. Теве М.Шкетан лӱмеш Кугыжаныш премийын лауреатше Н.Ефарицкая эрвелмарий ӱдыр-влакын куштымашыштым ончыктен. А тӱрлызӧ А.Ямбарцева чевер солыкым устан тӱрлен. Российын сулло сӱретчыже И.Ефимовын «Шыже сюжетше» этнофутурист направлениян.
Моло авторынат пашаштышт Марий Элысе пӱртӱсым, ерым, олыкым, посёлко ден олам да уремлаштым, моло верымат ужына. Портрет-влакат улыт.
Тений Российын сулло сӱретчыже лӱмым налше С.Алдушкинын ончерыш вич радынажым ойырымо. Тушто марий ял, пӱртӱс да марий артистке койыт.
УМБАКЫЖЕ — «Кугарня» газетын 24 ноябрьысе номерыштыже.
П.Васильевын фотожо-влак.