Специальный военный операций кайыме верыште Шочмо элна верч шогышо эше ик самырык рвезе Илья Игнатьев дене палдарена.
Писе да кожмак
Илья – Морко район Волаксола ялеш шочшо икшыве. Вероника аваже Кӱчыкэнер ял марий Игорь Ивановлан марлан лектынат, ты ялыш илаш кусненыт. Илья тунам эше изи лийын. Пешак писе, кожмак йоча ыле, нигунам лӱдын-вожыл шоген огыл.
Садланак ялыш илаш толмыж почеш моло рвезе-влак дене сырымашат лиеден, кредалынытат. Но ялысе йоча-влак коклаште умылыдымаш вашке эртен, ик жап гыч чыланат вашла келшен илаш тӱналыныт.
Илья Эҥерсола школыш тунемаш коштын. Тудо моткоч ару, мутым колыштшо кушкын. Районышто, республикыште эртаралтше конкурслаште шке мастарлыкшым ончыктен. Школ деч вара Йошкар-Олаш тунемаш каен. А 18 ийым темымеке, 2021 ий шыжым, тудым армий радамыш налыныт. Служитлен Марий Элыштак, ракетный частьыште, охране да разведке группыш логалын.
«Белгородышто улам»
2022 ий августышто СВО-ш каяш контрактым подписатлен. Ончыч Белгород областьысе полигонышто тунеммашым эртымеке, кок арня гыч Украина мландыш наҥгаеныт.
– Кайымыж деч ончыч йыҥгыртен, контрактым подписатлыме нерген мутланенна. Шочмо кагазшым йодын. Сӧй пасуш кайыме нерген тунам ик мутымат луктын огыл, – Ильян аваже, шинчавӱдшым ӱштылын, тунамсе жапым шарналтен каласкала.
23 августышто, шочмо кечынже, Илья Донбассышке лектын кудалын. Тунам эше кыл лийын, аваж дене телефон дене йыҥгыртен мутланеныт. Но эрге Белгородышто улам манын ойлен. Тыште связь уда, ом йыҥгырте гын, ида йомдаре манын шижтарен. Бойыш кайымыж нергенат рвезе нимом ойлен огыл. Йодыштмылан вашмут эре икте лийын: «Чыла сай. Машина але мотоцикл дене я ик вере кудалышытына, я вес вере колтат». А шкеже сӧй пасушто тушман ваштареш кредалын, да пел ий аважлан ойлен огыл.
Икана Илья аважлан интернетыште ик видеом ончаш темлен. Тале кредалмаш каен, тушто Вероника Александровна шкенжын эргыжым пален.
– Илья саде видеошто сусыргышо мойн лийын огыл. Шучко пуламыр гыч лекташ армийыште ямдылалтмыже чотак полшен. Ик бой годым БТР-ышт пудештме дене уло вургемышт ломыжыш савырнен. Эсогыл ӱмбал вургемыштат йӱлаш тӱҥалын. Садлан тунам мӧҥгӧ гыч посылкым колтымо ыле, – каласкала Вероника Александровна.
Йӱдым, ончылгоч шижтарыде
Тылеч вара Илья отпускыш толын. Йӱдым, нигӧм шижтарыде. Мӧҥгыштыжӧ чылан малаш возыныт улмаш.
– Машина мемнан тураш шогалмыла чучо, да ала-могай йӱк шоктыш. Телефонем йыҥгыртен колтыш. Нальым, акамын ӱдыржӧ «Маледа мо? Капкадам почса» манеш. Игорь пелашем вашлияш лекте, да тудын шортын колтымыжым кольым. Почешыже тарванышым, ваштарешем, кугу пеледыш аршашым кучен, эргым пура. Илья кок арня каныш. Толмекыже, первый кок кече шыпак веле шинча ыле. Пелештет гын, пелешта. Уке гын, нимом ок ойло, огешат шыргыжал. Кумшо кечылан веле лушкыш, шыргыжале, мутланашат тӱҥале, – ойла салтакын аваже.
Отпускшо деч вара Илья мӧҥгеш частьышкыже пӧртылын. Вара Санкт-Петербургысо военный частьыште ик жап лийын. А кызыт Курск областьыште порысшым шукта, моло салтак дене пырля элнан чекшым арала. Тыштак Илья тренировкым эртара.
Галина Сошина.
Еш альбом гыч налме фото-влак.