Элна мучко чыла школ у тунемме ийлан шке омсажым почаш ямдылалтеш. Ик вере тунемме тӧнежым тӱрыснек ямдылен шуктымо гын, вес вере олмыктымо паша умбакыже кая.
Советский район Ӱшнур школыштат паша шолеш. Тений тыште моткоч кугу ачалыме паша каен.
«Школнам олмыкташ манын, тений федеральный бюджет гыч мыланна 6 млн утла теҥгем ойырымо. Чыла окнам, противопожарный омса-влакым вашталтыме, кочкаш ямдылыме верым ачалыме. Тыгак вӱд системым, канализацийым, туалет пӧлем-влакым уэмдыме. Эн шуко окса, 2 миллионат 700 тӱжем теҥге, леведышым вашталташ каен. Кызыт школыш пурымаште тошкалтышыш брусчаткым оптат», – мане школ директор Валерий Фёдорович Галкин.
Олмыктымо паша деч посна Ӱшнур школышто «Точка роста» федеральный национальный проект почеш кум классым ямдылыме. Кызытсе илышлан келшыше 7 миллион теҥгеаш у оборудований-влакым шындыме. Лишыл жапыште эше 2 миллион теҥгелан кондышаш улыт.