«Кугарня» газет редакций «Православная инициатива» тӱнямбал грант конкурсышто сеҥышыш лектын. Тудын полшымыж дене идалык мучаш марте республикысе икмыняр черкыш лектын кошташ да нунын пашашт дене кумданрак палдараш тӱҥалына. Вет черкыш еҥ-влак кумалаш, языкыштым касараш веле огыл коштыт. Черке ожнысек калыкым туныктен шогышо верлан шотлалтын, арам огыл тудын пелен ондак церковноприходский школ-влак лийыныт. Кызытат йоча-влак Рушарня школыш коштыт, самырык-влаклан патриотический клуб-влак улыт. Тыге ӱдыр-рвезе-влак арам перныл огыт кошт, жапыштым пайдалын эртарат, кӧргӧ чоныштым пойдарат, чын илыш корныш шогалыт. Еҥ-влак вий-куатым налаш, чер деч утлымо ӱшан дене святой памашлашке толыт. Коллективна дене меат июнь мучаште У Торъял кундемысе икмыняр шнуй верлаште лийна.
Элембай селасе преподобномученик Андрей Критский лӱмеш черкыште лийна. Тудын настоятельже, протоиерей Сергий Бажанов мемнам порын вашлие да изирак экскурсийым эртарыш. Тыгак Петричата ял воктенысе святитель Николай Мирликийский лӱмеш шнуй памашыш миен коштынна. Тиде вер ты кундемышет илыше еҥ-влаклан веле огыл, паломник-влаклан келша. Еҥ-влак вудын эмлен кертше вийжылан ӱшанат. Кажне ийын майыште, святойым шарныме кечын, крестный ход дене коштыт. Меат тамле вӱдым подылна, вий-куатым нална.
Тушеч корнына Бахтино ял воктеке шуйныш. Тыште шнуй Пантелеймон лӱмеш памаш уло. Тышке паломник-влак Марий Эл гыч веле огыл, тыгак мӱндыр кундемла гыч толыт. Памашыште 2002 ийыште йӱштылаш пураш кок верым келыштарыме: ӱдырамаш да пӧръеҥ-влаклан посна. Тыгак часамла уло.
Бахтино ял Масканур ял деч йӱдвел-эрвел могырышто ик меҥге тораште, Изи Талмань эҥер воктене, верланен. Ондак ял Талмань маналтын. Тушто 1985 ийыште евангелист Иоанн Богослов лӱмеш пу храмым чоҥымо улмаш. Тыште ожно илыше еҥ-влакын мутышт почеш, священник черланен колтен — йолжо коршташ тӱҥалын. Верысе памашыш миен, йолжым мушкын да вигак куштылго лиймым шижын. Священник великомученик Пантелеймоным шарныме кечын тӧрланен. Садлан памашлан тудын лӱмжым пуымо.
Тыште вӱд мландыйымалысе ер гыч лектеш маныт. Тудо минеральный вещества-влаклан поян.
9 августышто кажне ийын тыште торжественный службо эрта. Тышке тӱрлӧ кундемла гыч шуко еҥ погына.
