Школжат тошто, йочажат шагал

Советский район Кукмарий тӱҥ школышто кызыт 18 йоча тунемеш. Тенийысе тунемме ийыште икымше классыш толшо лийын огыл. Шанер, Ваштаршӱ, Яҥгранур, Пивактын почиҥга, Шуймучаш, Мугыл ялла гыч тунемше-шамычым школ автобус шупшыкта.

Кукмарий школышто Г.К.Басова директорлан латкумшо ий пашам ышта. Пошкырт кундем Мишкан район Кӱшыл Шогертен ялын шочшыжо Марий пединститутым руш йылмым да литературым туныктышылан тунем лектын. Ончыч Кукмарий йочасадыште пашам ыштен, 2001 ийыште школыш пашаш толын.

– Школышто шым туныктышо пашам ышта. Йоча-влак тыршен тунемыт, мероприятийлаш чолган ушнат, – манеш Галина Константиновна.

В.И.Волкова школышто 26 ий пашам ышта. Валентина Ивановна – 2011 ий годсек директорын туныктымо да воспитатлыме паша шотышто алмаштышыже.

Школыштына йоча шагал гынат, тӱрлӧ конкурсышто шкенам тергена. Мероприятий-влакымат эртарена. Шукерте огыл «Живая классика» почеламутым сылнын лудмо конкурсыш, 17 мартыште Российысе самырык-влакын «Движение Первых» движенийышкышт ушнышна. Тунемше-влак коклаште патриотизм шӱлышым вияҥдена. Урок-влак деч вара ӱдыр-рвезе-влак театральный кружокыш коштыт. Тыгак ОГЭ-лан руш да англичан йылмыла да математике дене кружоклаште ямдылалтына.

Эн кугу нелылык – йоча шагал. Школыш пашаш толмем годым 200 наре йоча коштын, активист-влак шукын лийыныт, пашам ышташат куштылго ыле. Теве шукерте огыл вич тунемше дене «Дорогая моя столица, золотая моя Москва» сетевой проектыш ушненна. Тиде проект вич тунемшым уша гын, моло проектлан 13 йоча гына кодеш. Туге гынат школыштына паша шолеш, илыш дене тӧр ошкылына манын кертам, – каласкала Валентина Ивановна.

Авторын фотожо-влак.