«Россия – страна возможностей» президентский платформо проектын «Моя страна – моя Россия» Российысе конкурсын финалышкыже 300 эн тале участник логалын. Нунын коклаште – Марий Эл гыч кок еҥ: Кужэҥер посёлкысо 2-шо №-ан школын тунемшыже Анна Гребнева ден Кино да телевидений институтын студенткыже Софья Сутягина. Анна дене лишкырак палыме лийна.
Коваже кумылаҥден
Ӱдыр – Кужэҥер посёлко гыч, тений 11-ше классым тунем пытарен. Школышто тудлан утларак биологий ден музык урок-влак келшеныт. Биологийым йӧратымыже Анналан коваже Клавдия Ивановна Ванцова деч куснен, тудо шке жапыштыже биологийым туныктышо лийын. Ӱдыр скрипке ден гитарым шоктен мошта, музык чоншижмашым мут деч посна почын пуаш полша, манеш.
Школышто А.Гребнева тӱрлӧ конкурсышто, олимпиадыште шкенжым терген. Биологий, обществознаний, историй, экологий, руш йылме дене районысо олимпиадылаште участвоватлен. Музыкальный конкурс ден фестивальлашкат уло кумылын ушнен.
– Ончыкыжым биологий дене кылдалтше специальностьлан тунемаш шонем. ЕГЭ шеҥгелан кодын, ынде ласканрак шӱлалташ лиеш. Руш йылме да математике деч посна биологий ден обществознанийым сдатленам. Экзамен-влаклан ончылгочак ямдылалташ тӱҥалынам. Туныктышем-шамычлан полшымыштлан кугу таум ойлем. Сайын сдатленам манын, моткоч ӱшанем, – манеш А.Гребнева.
Туныктышо темлен
«Моя страна – моя Россия» конкурсын «Моя многонациональная Россия» номинацийышкыже Анна «Школьный музей» проектше дене ушнен. Проектлан келшышын, школышто тоштерым почыт, тыге тунемше-шамычым патриотизм шӱлышеш кушташ да школ историйым сайынрак палаш эше ик йӧн ышталтеш. Тоштерлан материалым да экспонат-влакым погат, тематический зоно-влакым ямдылат, экскурсовод-шамычым туныктат. Мультимедийный оборудованийым налаш, пӧлемым олмыкташ да мебельым налаш палемдыме. Тоштерым школлан 30 ий теммылан, 2026 ий октябрьыште, почшаш улыт. Тушто тунемше-шамычлан тематический урок, тӱрлӧ мероприятий ден вашлиймашым эртараш шонат. Ончыкыжым, тоштерын пашажым саемдаш манын, электронный ресурсым ямдылынешт.
– Руш йылмым туныктышо Любовь Валентиновна Петухова школ тоштерым почаш проектым ямдылаш темлен. Тидым ышташ педсоветыште пунчалыныт, вуйлаташ Любовь Валентиновналан ӱшаненыт. Мыланем элнан историйжым шымлаш келша, садлан уло кумылын келшенам. Экспонат-влакым погаш тунемше ден туныктышо-шамыч полшеныт, посёлкысо калыкат ӧрдыжеш кодын огыл. Но ты пашам вораҥдарен колташ шийвундо кӱлеш, садлан «Моя страна – моя Россия» конкурсыш ушненна.
Финалыш логалмылан куаненна да моткоч ӧрынна, вет элнан чыла регионжо гыч 74 369 еҥ тушко йодмашым колтен. Тыгайже лийынат ок керт манын шоненам тӱҥалтыште. Олимпиадыште сеҥышыш лекше спортсмен улмем гай чучын мыланем, – ойла ӱдыр.
Финалист-влак шке проектыштым 14 июньышто онлайн-формат дене аралаш тӱҥалыт. Анналан сеҥымашым тыланена!
А.Гребневан альбомжо гыч налме фото.