Морко район Шӱргыял школыштына кажне ийын «Казаков лудмаш» эртаралтеш.
Тиде ийын таҥасымаште 24 йоча шке чолгалыкшым терген. Шукынжо Миклай Казаковын почеламутшым лудыныт, а Надежда Сергеева шке возымо почеламутым лудмо номинацийыште усталыкшым ончыктен. Тудо тачысе саманлан келшыше «Тыныс верч» почеламутым серен.
А моло тунемше-влакым почеламут конкурсыш ушнаш марий йылмым да сылнымутым туныктышо Елена Валериановна Григорьева кумылаҥден. Тудо шкеат конкурс почмаште М.Казаковын «Мый Москваште каем» почеламутшым лудо. Изи тунемше-влаклан класс вуйлатышышт почеламутым ойыреныт.
Эн сылнын лудшо-влак семын Таисия Корякова, Полина Борисова, Арина Павлова, Татьяна Белкова, Александр Эманов, Мария Сергеева, Андрей Николаев, Диана Сергеева да Диана Скворцова ойыртемалтынна. Ынде район кӱкшытан таҥасымашлан ямдылалтына.
Диана Скворцова, «Марий сылнымут садвечыште» кружокын старостыже.
Снимкыште: Шӱргыял школышто эртаралтше «Казаков лудмашын» чолга лудшыжо-влак.