Кужэҥер район Руш Шой школын чапшым нӧлтышӧ, сеҥымашыш чӱчкыдын шушо, чолга тунемше-влак шагалын огытыл. Нунын кокла гыч иктыже – ты селаште шочын-кушшо, 10-шо классыште тунемше Даяна Михайлова. Тудо школ лесничествышке коштеш, конкурслаште ойыртемалтеш, волонтёр пашамат тыршен шукта.
Пӱртӱсым йӧрата
Пӱртӱсым, чодырам йӧратымыж дене Даяна школ лесничествылан кумылаҥын. Ӱдырын мутшо почеш, тачылан тушко 40 утла тунемше коштеш. Тыште чодырасе илыш ойыртемым, пӱртӱс тӱням сайынрак пален налыт, тӱрлӧ пушеҥгым, кушкылым ойырен мошташ, тӱрлӧ прибор дене пайдаланаш тунемыт. Тӱҥжӧ – чодырам аралаш кумылаҥыт.
Тыште ӱдыр-рвезе-влак проект пашамат возаш тунемыт. Даянан да ик рвезын возымо «Цветущая планета» проектышт ӱмаште «Лесные братья» республикысе слётышто икымше верыш лектын. Д.Михайлова пашажым тӱрлӧ проект конкурсыш аклаш колта да ончыл верыш чӱчкыдын лектеш. Тудо районысо, республикысе, Российысе конкурслаште ойыртемалтын.
Кундемыштына школ лесничестве-влаклан эртыше слётыш ӱдыр кок гана миен коштын. Тений тудо 22-24 сентябрьыште Шап ер воктене эртаралтеш. Даяна да эше кум тунемше тушто таҥасаш тӱҥалыт.
– Школ лесничествым биологий ден химийым туныктышо Майя Витальевна Охотникова вуйлата. Мыланем тушто прибор дене пашам ышташ поснак келша. Таксаций паша лишыл. Ӱмаште ты направлений дене республикысе слётышто ойыртемалтынам. «Лучший юный таксатор» номинацийыште икымше верым налынам.
Школ лесничествыште ме чодыраш коштына, пушеҥгым шындена, школ кумдыкым эрыктена, тӱрлӧ шымлыме пашам шуктена, презентацийым ыштена. Тыгак экологический йолгорным шотыш кондена. Мутлан, Йошкар книгашке пурышо кушкыл-влакым аралена.
Тенийысе слётышто мастер-класс-влак, тӱрлӧ таҥасымаш лийыт. Мый таксаций паша шотышто шкем тергаш тӱҥалам, – мане Д.Михайлова.
Активын еҥже
Даяна – Российысе йоча да молодёжь толкынын Руш Шой школысо активистше. Тыште икмыняр направлений дене кӱлешан пашам шуктат. Мероприятийым ямдылат, конкурсышко ушнат, школ газетым луктыт.
– Тышке икымше гана ушнышо-влак мероприятийым, тӱрлӧ акцийым эртарат. Ме, 12 еҥан команде, сценарийым возена, мероприятийым, акцийым ямдылена да чыла тидым эртараш полшена. Тӱрлӧ проектыш ушнена. Мутлан, ешге куржталмашыш лектынна. «Марий Эл – территория заботы и заботливых людей» проектыш ушнаш ямдылалтына. «Школьный вестник» газетым луктына. Школышто мо ышталтме нерген газетыш мый возем, – ойла ӱдыр.
Даянан организатор мастарлыкше уло. Шке йырже шуко еҥым чумырен кертеш, кумылым налын мошта. Сандене изижге-кугужге тудым колыштыт, умылат.
Чыла шотыштат мастар
Сайын тунеммыж денат Даяна моло деч ойыртемалтеш, поснак биологий ден химийым сайын пала. Нине предметла дене тудо 9-ше класс деч вара экзамен-влакымат кучен, олимпиадылаштат ончыл верыш лектын.
Школышто эртаралтше кеч-могай концертыш але мероприятийыш вуйым шупшде ушна. Мураш-кушташ мастар. А яра жапшым ӱдыр спортлан ойыра: волейболла, баскетболла талын модеш, команде дене районыш, республикыш лектын коштеш.
Тыгодым волонтёр пашамат шукта. Школысо тӱрлӧ мероприятийыште полышкала. Тений тыгак тудо Визымйыр ялыште «Марий Швейцарий» каныме базыште эртыше ик фестивальыште волонтёр лийын. Марий самырык тукым слётыш ушнен. Ятыр йолташым муын, шукылан тунемын.
Тыгайрак тачысе лаштыкнан геройжо. Тудо тыматле койышан, чыла вере шуаш тыршыше ӱдыр. Тунемше-влаклан тыгай лийын кодаш тыланыме шуэш. Вет илышыште шкем тӱрлӧ могырым терген ончыман, мо лишыл улмым умылыман. Тидыже ончыкылыкым рашемдаш, кӱлеш корно дене каяш полша. Даяна ончыкыжым врач лияш шона.