каласен Марий Элым Вуйлатыше Юрий Зайцев 28 ноябрьыште вияш линийым эртарымыж годым.
Корно
Марий Элыште тений «Инфраструктура для жизни» нацпроект почеш 122 км корным олмыктымо, а 2026 ийыште 240 км ачалалтшаш.
Юрий Зайцевын палемдымыж почеш, 2024 ийыште «Безопасные и качественные дороги» нацпроект почеш пашам сайын мучашленна, тудын апочеш регионысо да муниципалитет-влак кокласе 52,7% корным нормыш кондымо. 2022-2024 ийлаште 1000 км наре кугорным тӧрлымӧ. А 2030 ий марте нацпроект почеш 60 процентым нормыш кондаш палемдыме.
Рӱдолаш пурышо Шоя-Кузнецово ялыште инфраструктурын укелыкшат калыкым тургыжландара. Тушто 2000 мланде участкым пуэныт, тышеч 1600 участкыжым – шуко шочшан еш-влаклан. Корныш шаргӱм кызытеш икымше черетыште веле шарыме. Чылажымат эркын дене ышташ тӱҥалына манын Вуйлатышына.
Волжск олаштат корным ыштыме нерген ешарен: вес ийлан ты пашалан 85 млн наре теҥге ойыралтеш. Тыгодым тусо 107-ше Бригаде уремат тӧрлалтеш.
А Йошкар-Олаште Черняков бульвар вес ийын моторешт шуктышаш, манын.
Тунемме вер
Регионым Вуйлатыше вияш эфир годым Волжскышто у школым чоҥаш тӱҥалаш палемдыш. Тидыже 6-шо номеран школым аварийныйлан кӧра петырыме йодыш гыч тӱҥале. Волжск олаште 2028 ийыште федеральный бюджетын оксаж дене школым чоҥаш палемдыме. «Но ме кум ий вучен огына керт, сандене 2026 ийыште республикысе бюджет дене тудым чоҥаш тӱҥалына», – мане Ю.Зайцев.
Медведевысе музыкальный школышто вер ситыдымаш шотыштат сай уверым каласыш. Ты зданийым пужен ыштат. Тидлан 600 млн наре теҥгем ойырат. А чоҥен шуктыдымо цирк арене олмеш концертный залым келыштарат.
Эмлымвер
Юрий Зайцев деч Йошкар-Оласе 4-ше номеран поликлиникым ачалыме шотыштат йодыныт. Кодшо ийын тудын тӱжвал тӱсшым уэмдыме, кызыт икымше пачашым олмыктат. 2026 ийлан тӧрлатен шуктышаш улыт, палемден Ю.Зайцев.
Тыгак ешарен: вашке Йошкар-Оласе 2-шо йоча поликлиникым да Республикысе клинический йоча эмлымверын инфекционный корпусшым чоҥен шуктат, Республикысе клинический эмлымверын икмыняр отделенийжым да корпус-влакын тӱжвал тӱсыштым уэмдыме. «Ме тыглай ачалена гына огыл, капитально олмыктена да кызытсе жаплан келшыше оборудованийым налын вераҥдена», – ойлен Вуйлатыше.
Вияш линий годым республикыште илыше-влакым спецопераций участник-влаклан полшымо шотышто тауштен. Тыгодым Марий Элыште боец-шамычлан тӱрлӧ сферыште 50 утла йӧным ыштыме нергенат ойлен.
– Ме СВО участник-влаклан пырля полшена да республикнам тӱзатена. Кугу проект-влакым умбакыже шуена: корным чоҥена да ачалена, здравоохраненийым да тӱвырам уэмдена, школым нӧлтена. Экономикым, туризмым вияҥдаш да паша верым ышташ предприятий-шамычлан полшена. Шуко сомыл ышталтын, ончылно эше утларак паша уло, – иктешлен Марий Элым Вуйлатыше.
Вияш эфир ик шагат шуйнен. А еҥ-влак 2000 утла йодышым колтеныт. Вуйлатыше чылажланак вашештен шуктен огыл. Сандене нуным министерстве ден ведомствылашке колтымо.