25 июнь гыч 1 июль марте Киров кундемыште школ лесничестве-влакын III региональный слётышт да II экологический форумышт эртаралтыныт.
Тушто Киров область гыч индеш, Марий Эл, Коми республикла, Угарман ден Пермь кундемла гыч ныл команде таҥасеныт. Марий Эл гыч Морко район Унчо селасе «Юные лесоводы» школ лесничествыжын командыже миен коштын. Нунын коклаште 9-ше классыш вончышо чолга ӱдыр-влак Кристина Ильина ден Алеся Григорьева лийыныт.
Форум ден слёт Суводский чодыра техникумышто эртеныт. Участник-влак школ лесничествыште, тыгак форумышто налме шинчымашыштым устан кучылтыныт, тӱрлӧ таҥасымашыште шкем тергеныт, шукылан тунемыныт. Тыгодым шуко йолташым муаш йӧн лийын.
Пытартыш ийлаште Унчо школ лесничествын пашаже вораҥеш, тӱрлӧ конкурсышто ятыр гана сеҥышыш лектеш. Кызыт тудым туныктышо Зульфия Камильевна Митрофанова вуйлата.
«Визытанлан» гына тунемеш
Кристина – Унчо школын ик эн уста да чолга тунемшыже. Тудо чыла «визытанлан» гына тунемеш, тӱрлӧ олимпиадыш ушна. Руш йылме дене районышто икымше верым налын.
Ӱдыр спортлан моткоч кумылан. Куржталаш йӧрата, куштылго атлетике дене шуко жап заниматла. Шкетынат, команде денат районысо, республикысе таҥасымашлашке ушна.
Пытартыш жапыште программирований дене курс-влакым эрташ тӱҥалын. Школым тунем пытарымеке, тудо программист лийнеже.
– Пӱртӱсым йӧратем. Тыге школ лесничествыш кошташ тӱҥальым. Адакшым ме чодыра воктене илена, садлан тушто шкем кузе кучаш пален налаш уто огыл, шонем.
Форум ныл кече шуйнен. Занятийлаште янлык, кушкыл, пушеҥге, таксаций, дендрологий, мландын могай да тудын мыняр лончан лиймыже, келгытше, пушеҥгым чын шындыме, могай инструментым кучылтмо да моло нерген пален налынна. Тыгак чодыраште йоммеке, шкем кузе кучымо, илен лекме, малаш верым ыштыме, тулотым тӱрлӧ семын ылыжтыме нерген каласкаленыт. Ме нӧшмым, озымым ямдылыме сушилкыште, пожарно-химический станцийыште, дендрологический садыште лийынна. Слёт годым чодыраште тӱрлӧ заданийым шуктенна.
Занятий-влак оҥайын эртеныт. Сандене йокрокланаш жап лийын огыл. Мыланна сертификатым да изирак пӧлекым кучыктеныт, – мане Кристина Ильина.
Мураш-кушташ тале
Алеся Григорьева «нылытанлан» да «визытанлан» гына тунемеш. Поснак географийым да биологийым йӧрата.
Тудо усталык шӱлышан ӱдыр. Мураш да кушташ кумылан улмыж дене поснак ойыртемалтеш. Гитарым шоктен, тӱрлӧ руш мурым мура. Тений апрель гыч йолташыже-влак дене пырля Шлань ялысе «Эр кече» ансамбльыш кошташ тӱҥалын. Моркышто Пеледыш пайремыште мастарлыкшым ончыктен шуктен.
– Чодыраште лияш, еҥ-влаклан полшаш келша, садлан школ лесничествыш кошташ тӱҥальым. Тӱрлӧ янлык, кушкыл, пушеҥге, посадке нерген шинчымашым налына. Кызыт шуко кушкылым ойырен моштем. Тыгак ме корнышто шӱкым погена, посадкыш лектын коштына. Школ воктене пушеҥгым шынденна.
Ик ий жапыште шуко прибор (азимут, высотомер, буссоль да молат) дене пайдаланаш тунем шуынам.
Киров кундемыште эртыше форумышто да слётышто лияш мыланем келшен. Тунемынна, тыгак тӱрлӧ мероприятийыш, киношко коштынна. Спорт дене кылдалтше мероприятий поснак шарналт кодын. Вес ийын ӱжыт гын, уло кумылын каена, – каласыш Алеся Григорьева.
Слётышто Кристина Ильина да Алеся Григорьева дене пырля ик классыште тунемше Дина Павлова да Марья Оразаева лийыныт. Нунат чолгалыкышт дене ойыртемалтыт, школын чапшым нӧлтат.
Тунемше-влак кокла гыч кеч ик тунемше тӱҥалме пашам умбаке шуя да чодыра профессийым ойырен налеш манын ӱшаныме шуэш.
К.Ильинан ден А.Григорьеван альбомышт гыч налме фото-влак.