Марий Эл Республикым вуйлатыше А.Евстифеев Волжскыш миен.
1985 ийыште чоҥымо 6-шо номеран школышто лийын. «Тиде школ олмеш весым чоҥыман. 2002 ийыште тудым капитально ачалыме, тыгаяк пашам 2012 ийыште ыштыме, кызыт адак тӱзатыман. Ачалаш вич миллионат пеле теҥгем Правительствын резерв фондшо гыч ойырена, но 2023 ийыште у тунемме ий у школышто тӱҥалшаш», – каласен регионым вуйлатыше.
Вара тудо шуко пачеран пӧртым чоҥымо площадкыште лийын. Ты 96 пачеран пӧртыш аварий лӱдыкшӧ пӧртла гыч еҥ-влакым илаш пуртат. Чоҥымо паша 30 ноябрьыште мучашлалтшаш. Кызыт визымше пачашым нӧлтат.
Тиде кечынак А.Евстифеев «Тумер» тӱвыра да каныме паркыште лийын. Тиде парк 2020 ийыште «Формирование комфортной городской среды» Россий конкурсышто сеҥен.
Тыгак Марий Элым вуйлатыше Сеҥымаш паркыш пурен. Шукерте огыл Афганистан сарын ветеранже ты паркыш военный техникым кондаш йодын. БТР-80 бронетранспортёрым паркыш пурымаште вераҥденыт.
16 июньышто лекше 29 номеран газетнан 2-шо лаштыкыштыже уверым кумданрак лудса!
Тыгак газетым электрон йӧн дене https://кугарня24.рф/shop налаш лиеш.