2 декабрьыште Москошто Россий Армийын рӱдӧакадемический театрыштыже Шочмо элым аралышын кечыжлан (9 декабрь) пӧлеклалтше «Лучшим воинам мира!» торжественный мероприятий эртаралтын.
Тушко спецоперацийын участникше-влакым да нунын ешыштым ӱжыныт. Сцене гыч палыме артист, ансамбль-влак выступатленыт. Касым вӱдышӧ-влак да «Звезда» телеканалыште «Время героев» программым вӱдышӧ Юлия Розенбург залыште улшо СВО герой-влак дене палдареныт да нунын подвигышт нерген каласкаленыт. Тыгай еҥ-влак коклаште Пошкырт кундем Илиш район Марин ял гыч марий рвезе Денис Айтиев лийын. Ефрейтор-пехотинец шкетын 17 минутышто тушманын опорный пунктшым поген налын кертын.
Ты видеоролик пошкырт марий-влак коклаште писын шарлен. Пошкырт кундем Илиш район Октябрь села гыч лудшына, газетышкына возкален шогышо йолташна Филипп Байтуков тудын нерген возен колтен.
Пошкудо-влак деч поро мут
Тиде видеоролик йымалан ончышо-шамыч «Кугешнена» да тулеч молым возеныт. Иктыже серен: «Тиде мыйын пошкудем». Тунам сайынрак ончальым да, Илиш марий нерген тыге ойлат манын шоналтен, оҥем ончыко генералын гай лекте. Кугешныме кумылем руаш гай оварыш. Мыят кугешнем Илиш районысо Марин ял рвезе Денис Айтиев дене! Ача-аван куанышкышт ушнем, шӱдӧ пачаш тупыштым вӱчкалтен, «Рахмат, тыгай эргым ончен куштымыланда» манын
каласынем.
Денисын ешыж нерген палаш шонен, Марин ялыш родем деке йыҥгыртышым. А Марин ял калык кузе куанен тиде уверлан. Денис лӱддымӧ, ур гай писе, патыр салтак маныт пошкудыжо, пырля тунемме, модмо йолташыже-влак. Аважын, Рая акайын, телефонжым пуышт. Йыҥгыртен саламлалтмек, эн ондак Денисым тыгайым ончен куштымыштлан Вениамин чӱчӱ ден Рая акайлан таум ойлышым да Денис нерген каласкалаш йодым. Аваже тыгерак
палдарыш.
Паша чот логалын
Денис – мемнан кокымшо эргына, 1997 ийыште шочын. Тӱҥалтыш школ деч вара Андреевка селасе школышто 9-ше класс марте, умбакыже СПТУ-што автомеханик-
лан тунем лекте. 2016-2017 ийлаште армийыште служитлен. Школышто тунемме жапыштыже вольыкым шуко ашненна, садлан эрак кынелын, вольыкым ончен, вара веле школыш каен. Урок деч варат вӱтасе вольык Артём изаж дене когыньыштын ӱмбалне лийын.
Ме ачашт дене – эре пашаште. Веня, ачашт, пенсийыш лекмешкыже, эре шофёрлан ыштыш, а мый – заправкыште, кладовщик-
лан, фермыште ушкалымат лӱштенам. Мариемын родо-тукымжын туткарыш логалмекышт, нунын кум йочаштым ешышкына налынна. Нуныланат Денис изашт семын лие. Кызыт эн изи шӱжарже профтехучилищыште поварлан тунемеш, тудо мемнан тӱҥ полышкалышына.
Изинек военный лияш шонен
Денисын изи годсо шонымашыже – военный, Шочмо элым аралыше лияш. Тиде шонымашак тудым 2021 ийыште Россий Армий дене контрактым подписатлаш таратен. Тудо Самара олаште служитлаш тӱҥалын. Тушеч командировкыш Украина мландыш колтеныт.
СВО тӱҥалын. Икмыняр жап гыч Денис отпускыш пӧртыльӧ. А мемнан ийготна ситышын: Вениаминлан – 69 ий, мыланем – 65 ий, тазалыкат уке. Мемнам кӧ онча манын сӧрвален, тудым пӧртылтышна. Изажат, авариеш логалын, илыш дене чеверласен ыле.
Идалык эртыш ала мо, 2024 ий январьыште, мыланна каласыдеак, уэш контрактым подписатлен, спецоперацийышке каен. Тушеч йыҥгыртен шижтарен: «Ачай, авай, мый СВО-што улам».
Денис чын пӧръеҥ койышан, шагал мутланыше, кеч-могай пашажым писын да шот дене ышта. Изинекак пашаште шуаралт кушмыжлан, очыни. Марин ялна Ош Виче эҥерын кӱкшӧ серыштыже верланен. Серже гыч ончалат, торашке коеш: кумда чевер олык, чодыра, ялла. Уремна-влакат кумда улыт, калыкат келшен ила, тыршен пашам ышта. Йоча-влакын, изинекак Ош Виче вӱдеш йӱштылын, икте-весе дене таҥасен, сер гыч серыш ийын вончен, капкылат, койыш-шоктышат шуаралтыныт.
Эргына йыҥгыртен шога, но шагал кутыра. Мо, кушто, кузе огеш каласкале. «Ачай, авай, чыла сай, ида тургыжлане», – манеш, шукыжым шке йодыштеш.
Москваш мийымыж нергенат пален огынал. Йыҥгыртыме годым «Мый аэропортышто улам» каласен. Шонышна, иктаж-кӧм вашлиеш але ужата. Молан мийымыжым тиде видеоролик гоч веле пален налынна. Тудыжымат изи ӱдырна интернетыште муын, мыланна ончыктен. Ачаж дене коктын куаненна. А могай ача-ава шкенжын икшывыжын тыгай патырлыкшылан, илыше кодмыжлан ок куане? Шаран районысо родем-влакат куаненыт. (Каласыман, Рая акай – Шаран район гыч, татар ӱдырамаш, марла сайын пала. – Авт.) Нунат видеороликым ужмеке веле Денисын СВО-што улмыж нерген пален налыныт.
Кызыт эргына уэш частьыште, вашке отпускыш пӧртылаш сӧра. Эсен-таза гына коштшо, суксыжо аралыже! Ме «эсен коштшо» манын кумалын, Дениснам вучена.
«17-ше номеран у легенде». Тыге каласеныт марий рвезе Денис АЙТИЕВ нерген Москосо торжественный мероприятийыште. Икмыняр арня ончыч Денис дозорышто лийын, обстановкым шымлен. Тудым тушманын опорный пунктыштыжо эскереныт улмаш. Рвезын лӱйкалымашлан келшыше верыш лекмыжым вученыт да кенета атаковатленыт. Денис
моткоч писын атаке деч шылын да шкеже нунын ваштареш лӱйкалаш тӱҥалын. Икмыняр минутышто тушманым «темдал» кертын. Тушман укрепленийыш гранатым
кудалтен. Тыге нуным йымыктарен. Ты жапыште рядовой Айтиев тушман окопыш тӧрштен, кум ВСУ боевикым кошартен, эше кокытым пленыш налын. Тушманын опорный
пунктшым шкетын поген налмыжлан Россий Армийын салтакше 17 минутым веле пытарен. Денис Айтиев Россий Президентын таумутшо дене палемдалтын да «За отвагу»
медальым пуаш палемдыме.