Йолташ-влак, ужыда, шижыда, мемнан деке У ий пайрем койын лишемеш! Чот вучымо пайремна да «У ий каникул»! Тудым кузе да кушто эртарыме шотышто кажныже кызытак планым ышта, ямдылалтеш.
Но ида ойгыро, йолташ-влак. Мландышарын кеч-могай кундемыштыже иледа гынат, Йошкар-Олаш, Рӱдӧ марий театрыш «миен толаш» йӧн лиеш. М.Шкетан лӱмеш Марий театр моткоч чапле У ий пӧлекым ямдылен. Каныш кечылаште, 2-8 январьыште, сценыште модмо чыла спектакльым вияш эфирыште тӱня мучко ончаш лиеш. Тидлан театрын сайтышкыже пураш, спектакльым ойырен налаш да «купить пря- мой эфир» кнопкым темдалаш кӱлеш (умбакыже ссылке почеш кайыман).
Тиде веле огыл, 25 декабрьыште «Шӱдыран сандалыкыште У ий» пайрем концертымат вияш эфир гоч ончен кертыда. Чыла спектакль да концерт Моско жап дене 16 шагатлан тӱҥалеш.
Шочмо кундем деч тораште илыме годым шке йылмет дене кутыралтен колтымым, марий мурым колышташ, куштымашым келанен ончаш – тидын деч сай пӧлекше эше мо лийын кертеш?!
Репертуарым театрын сайтыштыже ончалын кертыда: https://shketan.ru/afisha/
Светлана БЕЛКОВА,
театрын сылнымут пӧлкажым вуйлатыше.