«Салам, йӧратыме пелаш, ача! Нине корнылам возымо годым шинчавӱд шкеак йога. Мемнам икмыняр тӱжем меҥге ойыра. Кузерак илыштат, шӱмбелем?
Мемнан чыла сай: паша, йочасад, кастене гимнастике кружокыш вашкена… Тыге кече почеш кече эртен кая. Кажне эрдене кынелын, виян лияш тыршем. Тый дечет посна йокрок, чоным шӱлык авалта. Но мемнан изи шӱдырна, ӱдырна, кумыл волышо кошташ ок пу. Тудо кушкеш, сеҥымашлаже дене куандара, мыланем вийым пуа. Коктынат тыйым пеш вучена.
Йӧратымем, пале, ты неле пагытыште ме эре пеленет улына. Тек тиде кочо пагыт вашкерак эрта, да тый мӧҥгӧ пӧртылат.
Ме тый денет кугешнена! Тый Геройна, эҥертышна, аралышына улат! Шкендым переге. Кеч-кунам да кеч-куштат эре воктенет лияш ямде улам.
Тыйым йӧратыше пелашет, ӱдырет».
Тыгай серышым фото пелен пелашыжлан возен «Геройын пелашыже. Геройын аваже» проектыш ушнышо Светлана Тетерина. 2022 ий сентябрь гыч, Денис пелашыжын СВО-ш кайымыж деч вара, самырык аван да пелашын илышыже тӱрыснек вашталтын. Кажне кечын йыҥгырым але серышым вуча, чонышто – тургыжланымаш, шонкалымаш…
Индеш ий эртымеке
Кужэҥер район Токтайбеляк селан эргыже да Звенигово район Эсмекпляк селан шочшыжо 2008 ийыштак палыме лийыныт, а ешым чумыреныт индеш ий гыч веле. Тыйын пиалет гын, садак пӧртылеш, тыйын лиеш манме ой лач нунылан келшен толеш. Палыме лийме, келшаш тӱҥалме жапым Света тыгерак шарналта:
– 10-шо классыште тунеммем годым Йошкар-Олаш Шкетан лӱмеш театрыш класс дене толынна. Тунам Эсмекпляк села гычак йоча годсо йолташем Аграрный колледжыште икымше курсышто тунемын. Спектакль тӱҥалме марте эше жап уло ыле, садлан тудо йолташыже-влак дене пырля паркыш лектын да мыйымат ӱжын. Денисат тушто ыле, палыме лийынна. Тылеч вара кылна кок ийлан кӱрылтын.
МарГУ-ш тунемаш толмекем, сентябрьыште, Денисым йолташем дене пырля ик тӱшкаште эше ик гана ужынам, «Тиде саде рвезе, тудым палемыс!» шоналтенам. А ик тылзе гыч йолташ ӱдыремын шочмо кечыжлан Ий полатыш коньки дене мунчалташ миенна – Денисат тушто лийын. Ий полат гыч лекмеке, чылан остановкыш тарваненна. Мый, Денис дене кутырен, варашрак кодынам. «Света, вашкерак ошкыл, троллейбус толеш – вараш кодат!» – кычкыреныт ӱдыр-влак. «Света мый денем пырля кая!» – вашештен Денис ӱдыр-влаклан да мыйым йолын ужатен. Денисын тиде шомакше чонешем лакемалт кодын. Тунамак мыйым аралымыжым, чаманымыжым шижынам.
Пел ий келшымеке, Света рвезыжым Германийыш производственный практикыш кандаш тылзылан ужатен. А вес ий кеҥежым – армийыш. 2019 ий 30 августышто Йошкар-Олаште 100 наре еҥан марий сӱан гӱжлен.
– Мо дене Денис чонем савырен? Тыматле койыш-шоктышан, уто мутым ок лук, йолташ-влак коклаште тале улмыжым ончыкташ ок тырше. Кеч-мом ышташ тӱҥалмыж деч ончыч сайын шоналта, вара гына пашалан пижеш. Лишыл еҥже-влаклан кеч-кунам полша. Чоҥымо пашаланат кид-йолжо толеш, – ойла Света.
Герой, аралыше
СВО-ш кайымыж деч ончыч Денис «Марикоммунэнерго» ООО-што диспетчерлан пашам ыштен. 2022 ий сентябрьыште, частичный мобилизацийым увертарымеке, тудлан повестке толын. «Мый кайышаш улам! Чыла сай лиеш!» – манын пӧръеҥ лишыл еҥже-влаклан. А Светан ушыштыжо, чоныштыжо мо ышталтын тунам?! «Ала тиде мыскара гына? Уке? Ончыкыжым мо лиеш, кузе илыман?» – вуйыштыжо пӧрдын.
Тылеч вара Денис кок гана отпускыш толын каен. Пелашыжым ужатымеке, Светан ик кечыжат тудын нерген шоныде, тургыжланыде ок эрте. Лийже ыле ондакысе семын: йӧратыме пӧръеҥым паша гыч вашлият, жапым пырля эртарет, кӱлешан паша дене але ялыш миен толат… Но вуйым сакыман огыл. Ойгырымым, шинчавӱдым вашке вич ийым темыше ӱдыржыланат ава ок ончыкто. А Стефания – чылт ачаже гаяк: сынжат, койышыжат, ӱп тӱсшат. Тудат ачажым вуча. Иктаж оҥай случай лиймеке, «Ачамын йыҥгыртымыж годым каласкалена. Айда фотом ыштена, вара ачалан ончыктена» манеш. Ньога пала: ачаже – пашаште, тудо герой, нуным аралыше.
Света дене кутырымеке, эрлашыжым тудын деч тыгайрак серыш тольо: «Ирина, палет, таче шым шагат эрдене мӧҥгӧ гыч йочасадыш каяш ямдылалтмына годым омсаш тӱкалтышт. Почым, ваштарешем – Денис! Кок арнялан отпускыш толын, мыланна шижтарыде!» Лудмеке, чонем кок йӧратыше еҥ верч куаныш.
Еш альбом гыч налме фото.