17 февральыште Россий МЧС-ын Марий Элысе тӱҥ управленийыштыже пресс-конференцийым эртареныт. Тушто ведомствыште 2022 ийыште ыштыме пашам иктешленыт, тыгак пожар лӱдыкшыдымылык да вӱд объектлаште ситуаций дене палдареныт.
– Эртыше ий икшырымын эртен, шындыме чыла задачым шуктымо. Специальный военный операций годым МЧС Российын у регионлаже да Украина гыч беженец-влакым эвакуироватлыме сомылым шуктен. Тений 17 февральлан Марий Эл 400 наре беженецым приниматлен, нунын коклаште – 94 йоча. Мемнан пашаеҥна-влак Ростов областьыште, Российыш ушымо у регионлаште пашам ыштат.
Ӱмаште 50 наре чодыра пожар лийын, йӱлымӧ кумдык ик тӱжем наре гектарыш шуын. Августышто Юрино районышто чодыра пожар годым пашам сайын ыштымылан кӱчык жапыште тулым йӧртен шуктымо, – ойлен Россий МЧС-ын Марий Элысе тӱҥ управленийжым вуйлатыше элгӧргӧ службо генерал-майор В.Н.Шангин.
Вӱдшор тале лийшаш огыл
Марий Элысе МЧС управленийым вуйлатышын алмаштышыже – Гражданский обороно да калыкым аралыме шотышто управленийын вуйлатышыже С.В.Скоробогатов шошо вӱдшорлан ямдылалтме паша дене палдарен:
– Вӱд йымак кайыше оралте ден сооружений ӱмаште лийын огытыл. Теният тидын шотышто нелылык лекшаш огыл. Шошо вӱд апрельын икымше да кокымшо декадыштыже ташлышаш.
Икмыняр населенный пунктышто вӱд ташлен кертме лӱдыкшӧ уло: Йошкар-Ола (вич пӧрт), Йошкар-Олаш пурышо Нолька посёлко (9 пӧрт), Курыкмарий районысо Кым Ӹрде посёлко (кум пӧрт), Медведево районысо Куяр посёлко (32 пӧрт), Звенигово районысо Кокшайск посёлко (6 пӧрт).
32 процентлан шагалрак
Марий Элын пожар надзор, шотышто тӱҥ кугыжаныш инспекторын пашажым жаплан шуктышо элгӧргӧ службо полковник М.И.Шигабутдиновын ойлымыж почеш, тылеч ончычсо ий дене таҥастарымаште ӱмаште пожар 32 процентлан шагалрак лийын (996). Пожарыште 39 еҥ колен (2021 ий дене таҥастарымаште 37 процентлан шагалрак). Тул шукыж годым илыме секторлаште ылыжын. Амалже – тулым шекланыде кучылтмаш (53 процент), тыгак электроборудованийым кучылтмо годым правилым пудыртымаш (22,1 процент) да коҥга дене кылдалтше амал (10,7 процент).
Ӱмашсе тыгаяк жап дене таҥастарымаште тений пожар шукемын. 17 февральлан республикыште 112 пожар лийын.
30 еҥ пуреҥгаен
Россий МЧС-ын Марий Элысе тӱҥ управленийыштыже вӱд объектлаште калык лӱдыкшыдымылык шотышто пӧлкам вуйлатыше, маломерный суд-влак шотышто Марий Элын тӱҥ кугыжаныш инспекторжо М.А.Смирнова палемден:
– Ӱмаште республикыште 30 еҥ пуреҥгаен, нунын коклаште – кум йоча. Ятыр еҥ кеҥежым йӱштылмӧ годым, колым кучымо годым вӱдыштӧ колен, тыгак йӱшывуя шукын пуреҥгаеныт.
2022-2023 ийлаште телым ий кылмыме жапыште кок еҥым утарыме. Вашке – шошо, ий вичкыжемеш, садлан еҥ-влаклан тӱткӧ лийман.
Авторын фотожо.