Йошкар-Олаште илыше да полшаш кумылан еҥ-влак эше 2022 ий октябрьыште ВКонтакте соцкылыште «Шьём для наших» тӱшкам ыштеныт.
Кызыт ты тӱшкаш 175 еҥ пурен. А чынже дене полшаш кумылан еҥже ала-мыняр пачаш шагалрак. Но ӱдыр-ӱдырамаш-влак вуйым огыт саке – шке палемдыме сомылыштым кыртменак шуктат. Нуно балаклавым, футболкым, толстовкым, термобельём, пижгомым, маскхалатым, йымал вургемым ургат.
Тений паша кузе шукталтме нерген тӱшкан ик чолга участницыже Алёна Анисимова каласкалыш:
– Ме теният чыла тудо сомылымак ыштенна, шонем. А иктешлен каласаш гын, икте-весе деке тунем шуынна да келшен илыше ик кугу ешыш савырненна. Икте-весе верч эре тургыжланена. Теве ик ургызынан пелашыже сусырген ыле, тудланат полшышна.
Кугу эҥертышна – «Сердце матери» мер организаций. Тушто боец-влак дене вашлийме мероприятийлашке эре кошташак тыршена. Тидыже моткоч кӱлешан. Теве, мутлан, кеҥежымсе маскхалатым ургаш гына тӱҥалынна ыле, отпускыш толшо салтак-влак мыланна тыгерак йӧнан манын, ой-каҥаш-влакым ойленыт. Сандене шке пашанам уэмден кертынна. Кызыт ты маскхалатлан черет кугу, вет спецопераций кайыме верыште кеҥежше кужунрак шуйна.
Ик ургызына, Ольга, пушкыдо носилкам кузе ургаш кӱлмым шонен муын. Вет интернетыште сумка ден рюкзак кыллан кучылтмо пеҥгыде тасман материал гыч ыштыме носилкам гына ужалат. А нунышт, салтак-влакын ойлымышт почеш, йӧнан огытыл, тӱрлӧ вере пижедылыт. Санденак ныл шочшан ава да ургызо Ольга деке «Борус» специальный подготовко рӱдерысе отрядын командирже Михаил Пуртов тыгай йодмаш дене лектын. Тыге нуно пырля ик куэм дене носилкам ургаш эскизым шонен луктыныт. Варажым икымше носилка дене Марий кундемысе полигонышто пайдаланен онченыт. Ме носилкым ургаш манын, оксам погышна. Лачак кызыт икымше партийым «Сердце матери» мер организацийыш пуаш ямдылена.
Тиде носилке путырак йӧнан да куштылго. Боец-влак, тудым пӱтыралын, тупысо рюкзакышт йымаке вераҥден кертыт. Туддене сусыргышо еҥымат нумал лукташ да моло настамат наҥгаяш лиеш.
А тӱҥ шотышто паша радамна вашталтын огыл. Кажне тылзын оксам погена, кажне гана йодмаш почеш иктаж-мом шукырак ямдылена. Йошкар-Олан лӱмгече пайремыштыже «Сердце матери» штаб дене пырля поро кумылан акцийыш ушнышна. Шкенан сатунам, тыгак ӱдыр-влакын кидпашаштым ужалаш лукна. Тудым спецоперацийлан кӱлеш арверым налаш погымо оксаш пыштышна.
Кокланже мом ме ыштена, тиде теҥызысе чӱчалтыш веле манын шоналтена. Но салтак-влакын шомакышт, толын ӧндалмышт адак мемнам у сомыллан кумылаҥдат. Южыжо тыгак ойла: «Мемнам ида кудалте, те огыда пале, могай кугун мыланна полшеда». Такшым ме шагалын улына: 7-8 мастар еҥ урга да эскизым ямдыла. Поро кидым шуялтыше еҥ ден спонсоржат шукын огытыл. Туге гынат шкенан сай лектышна уло.
Мом мыняр ургаш йодмо шотышто «Сердце матери» организаций гыч эре ойленак шогат. Теве госпитальыш вургем кӱлмӧ годым ме писын гына чыла ямдылен пуышна. А эн тӱҥ результатшылан ик ешыш савырнымым шотлем.
Телымсе да кеҥежымсе маскхалат, носилка да моло кугурак арвер-влакым ямдылаш огына лӱд. Кызыт Лешийын костюмжо сынанрак вургемым йодыныт. Ме кузе ыштыме нерген шонкалена. Тудымат урген моштена, шонем. Тиде вургемат салтак-шамычлан кӱлешан да йӧнан лийшаш.
Тыгак ме моло олаласе поро кумылан организацийла дене кылым кучена, опытна дене вашла пайлалтына – икте-весынам пел шомак гыч умылена.
Каласыман: ончычсо семынак пӧръеҥна-влаклан йымал йолашым ургаш куэмым вучена. Йошкар-Олаште илыше-влак мыняр кондат, ме туддене вигак урген колтена. Южо еҥын мӧҥгыштыжӧ ончычак налын пыштыме куэмже рулон дене аралалтеш. Тыглай кийыме деч тудым мемнан деке кондаш йодына. Вет тылзеш 200-300 йымал вургемым урген колтена. Пӧръеҥ-влак тудым мушкын огыт керт, вӱд тушто аяран, сандене тиде эре кӱлешан.
Поро кумылан-влак улыт, шонена. Теве рӱдоласе Кирпичный уремысе ик автосервисын пашаеҥже-влак носилкам ургаш тӱҥалмынам пален налыныт да куэмым налаш кугу оксам колтеныт. Ме тыгай полышым пуышо кажне еҥлан таум каласена.
Чынжымак, пырляште – вий. Тыныслыкым аралыше салтакна-шамычлан айста чыланат кертме семын полшена, куэмым наҥгаен пуэна але оксам колтена.
Пагалыме лудшына-влак! Полшаш кумылда уло гын, Алена Юрьевна Анисимован ВТБ картышкыже (2200 2404 4099 7407) куэмым налаш манын палемден, надырдам пыштен кертыда.
Эльвира Терентьева.
Фотом «Шьём для наших» тӱшкан архивше гыч налме.