Украиныште военный спецопераций эртыме дене шуко еҥ икте-весылан эҥерташ, ик еш гай лияш тунем шуын. Кундемнан шуко районыштыжо кызыт маскировочный сеткым пидаш тӱҥалыныт.
Рӱж пидыт
Украинысе спецоперацийыш Чакмарий ял шотан илем гыч 22 пӧръеҥ каен. Нунын коклаште контракт почеш служитлыше, шке кумылын кайыше да мобилизацийыш логалше-влак улыт. Шочмо вершӧрыш таза пӧртылмыштым тыште чылан вучен илат да кузе-гынат полшаш тыршат. Шошым ик кугу КамАЗ машина дене гуманитарный полышым колтымо. Тыгак, спецоперацийым шуктышыла, илыш дене чеверласыше Михаил Ситниковлан Чакмарий школышто мемориал оҥам почмо.
Кызыт Провой велысе волонтёр-влакын тыршымыштлан, верысе администрацийын полшымыжлан кӧра Чакмарий тӱвыра пӧртыштӧ маскировочный сеткым пидаш тӱҥалыныт.
– Кундемнасе чыла ялышке лектын коштын, кажне суртыш пурен, 300 тӱжем теҥге наре оксам погенна. Салтак-влак мыланна мо кӱлешым ондакак возен колтеныт. Сандене ты шийвундо дене бензопила, кӱртньӧ кольмо-влакым, сварке аппаратым, тӱрлӧ вургемым да моло арверым налынна. Тыланымашан серыш дене пырля грузым Украиныш колтенна. Полышна миен шуын, мыланна таум ойленыт. Вес ганалан полышым колташ ямдылалтына.
Тыгак Украиныште СВО-што улшо-влак лӱмеш стендым вераҥденна. Тушко чыла участникын фотоштым пижыктенна.
Маскировочный сеткым кузе ышташ волонтёр-влак сайын ончыктеныт. Нуно тидын шотышто мастер-классым эртеныт, кузе ышташ схемым мыланна пуэныт. Схеме неле огыл гынат, пеш шуко ыштыман, вет тудо кужу. Чакмарий администрацийым вуйлатыше Дмитрий Владимирович Желудкин мыланна материалымат налын пуэн. Пидаш кумылан кажне еҥ ушнен кертеш. Паша сайын кая гын, арняште ыштен шуктена, шонем, – мане Чакмарий тӱвыра пӧртым вуйлатыше Татьяна Ивановна Васильева.
Кум тылзе ыштат
Морко посёлкысо 6-шо №-ан школышто маскировочный сеткым кумшо тылзе пидыт. Ты пашашке туныктышо, тунемше, тыгак школышто тыршыше моло пашаеҥ-влак рӱж ушненыт.
Тиде школышто кызыт 365 тунемше шинчымашым налеш, 24 туныктышо пашам ышта. Морко посёлко гыч Ольга Андреевна Николаева ты школышто кандашымше ий тырша. Тудо директорын воспитатлыме паша шотышто алмаштышыже, тыгак англичан йылмым туныктышо. Ольга Николаеван мутшо почеш, Украиныш СВО-ш кайыше-влаклан тӱрлӧ семын полшаш тыршат. Гуманитарный полышым колтеныт, тунемше-шамыч салтак-влаклан серышым возеныт, тыгак тыште маскировочный сеткым пидаш тунемыныт.
– Сеткым ышташ манын, Озаҥ гыч ик специалистым туныкташ ӱжынна. Тудо схеме дене палдарен. Эн ондак туныктышо-влак ыштен онченыт, вара йоча-влак тышке ушненыт. Нуно перерыв жапыште, урок деч вара пидаш коштыныт. Материалым шкенан администраций ойырен. Кызытеш ме кок маскировочный сеткым пидынна. Тудын лопкытшо – 6 метр, кужытшо – 9 метр.
Гуманитарный полышым пытартыш гана шошым колтенна. Тунам 23 яшлыкыш вургемым, лампычкым, эмым, шере кочкышым да молымат оптенна. Тунемше-влак салтак-влаклан серышым возеныт. Теве Украина гыч ик рвезе отпусклан мӧҥгыжӧ толын да школыш пурен лектын. Тудо йоча-влакын серышыштым пеленже конден да пӧлекым кучыктен, кугу таум ойлен, – мане О.А.Николаева.
Калыкын поро кумылжо Украиныште СВО-што улшо-влаклан неле-йӧсым сеҥаш да чактараш полша. Сандене, ӧрдыжеш кодде, тыгай пашаш ушнаш тыршыман. Йоча-влакат молодец улыт. Серышышт дене салтак-влакын кумылыштым налын моштат, мучашдыме куатым да могай-гынат ӱшаным ешарат.