Шкеат чот тыршыман

Ик айдеме, пашаш кайышыжла, юзо еҥым вашлийын. «Таче юзо кече, мый тыйын кум шонымашет шуктен кертам», – манын тудо.
«Чапле машинан лийнем», – каласен айдеме. Воктеныже тыгай машинам ужмеке, тыманмеш шинчын кудалын. Но вес кечынак сырыше пӧртылын. «Кечыгут ола мучко кудалыштым, еҥ-влак чыла машинам ик семын ончат. Мыланем машина огыл, а шуко-шуко окса кӱлеш, мом шонем, тудым налын керташ», – ойлен вес шонымашыжым. Юзо еҥ оксам пуэн колтен.
Вес кечын адак вашлийыныт. «Мом шоненам, чыла налынам. Но мыланем тиде тетла куаным огеш кондо. Мый йомакысе гай мотор ӱдырым вашлийнем», – манын айдеме, воктеныже тунамак сылне ӱдырым ужын. Тудым кидпӱанже гыч вӱдалтен, да ошкыл каеныт.
Кок арня гыч айдеме адак ты верышкак пӧртылын. Сырыше, кумыл волышо лийын. «Йомакысе ӱдырет тугай чот мутым колыштшо, мыланем пеленже пеш вашке йокрок лийын. Тудлан мыйын оксам гына кӱлын, ситыше шийвундым удырен лукмеке, мый дечем каен. Иктым-весым тый дечет йодам, но мо шонымем от пу», – вуйым шиеш айдеме. «А тый шкежат мо кӱлмым от пале. Машинам йодат, но чынжым пагалымаш кӱлеш, оксам йодат – эрыкан лийнет, ӱдырым йодат – йӧратымашым вучет», – пелештен юзо еҥ.
Илышыште шонымашке шуаш манын, шкеат чот тыршыман. Шоналте: мо тыланет чынжым кӱлеш, шонымашкет шуаш могай йӧнет уло?