Ик нужна пӧръеҥын ватыже ӱйым шӱшкын, тудым йыргешке форманым да ик килограмм нелытаным ямдылен. Ӱй чумыркам пӧръеҥ кевыт озалан ужалкален, а олмешыже суртышко мо кӱлешым наледен.
Ик кечын кевыт оза ӱйын нелытше шотышто кокытеланен колтен. Тунам кажне ӱй чумыркам висаш шонен пыштен. Да пален налын: ӱйын нелытше ик килош ок шу. Кевыт оза пӧръеҥлан сырен. Вес кечын ты нужна еҥым вашлийын да шыдын каласен:
– Тетла тый дечет ӱйым налаш ом тӱҥал, тый ӱй чумыркатым ик кило нелытан манын ужалет, а тудо 900 грамман веле.
Нужна еҥын кумылжо волен, вуйым сакен каласен:
– Мемнан висана уке. Но мый тый дечет ик кило дене сакырложашым наледенам да тудым ӱйлан виса семын кучылтынам.
Пале: шке висат дене тыйымат висат, аклат!